उस्मानाबाद - पत्नीचा खून करून पतीने गळफास घेत आत्महत्या केल्याची घटना लोहारा तालुक्यातील अचलेर येथे उघडकीस आली आहे. दत्तुसिंग राजेंद्र ठाकूर (वय ३५) आणि संगीता ठाकूर (वय ३२) असे मृत पती-पत्नींची नावे आहेत. दत्तूसिंग याने पत्नीचा खून कोणत्या कारणामुळे केला याबद्दल पोलिसांकडून चौकशी सुरू आहे.
दत्तूसिंग ठाकूर पत्नी संगीता दोन मुली व एका मुलासह अचलेर गावातील झोपडपट्टी परिसरात राहत होता. एका जीपवर तो चालक म्हणून काम करत होता. दरम्यान, रविवारी रात्री पत्नी आणि मुले झोपेत असताना त्याने पत्नीचा धारदार शस्त्राने खून केला. त्यानंतर स्वत: गळफास घेऊन आत्महत्या केली. ही घटना सोमवारी सकाळी उघडकीस आली.
ज्या खोलीत दत्तूने गळफास घेतला त्याच खोलीत पत्नी संगीताचा मृतदेह रक्ताच्या थारोळ्यात पडला होता. या घटनेमागचे कारण अद्याप समजू शकले नाही. घटनेची माहिती मिळताच मुरूम पोलिसांनी घटनास्थळी धाव घेऊन पंचनामा केला. सोमवारी सायंकाळी उशिरापर्यंत पोलीस तपास करत होते.
चिमुकल्यांना दुसऱ्या खोलीत कोंडले
घटनेपूर्वी दत्तूने झोपलेल्या दोन्ही मुली व मुलाच्या खोलीला बाहेरून कडी घातली. त्यामुळे झोपेत असलेल्या या चिमुकल्यांना काहीच कळले नाही. सकाळी उठल्यानंतर दरवाजा बाहेरून बंद असल्याने त्यांनी हाका मारण्यास सुरुवात केली. कोणीच दरवाजा उघडत नसल्याने त्यांनी आरडाओरड केला. त्यामुळे शेजारच्यांनी दरवाजा उघडला तेव्हा खुनाचा प्रकार समोर आला.
