शेतकरी आत्महत्या प्रकरणी खासदार ओमराजे निंबाळकरांवर गुन्हा दाखल

कसबे तडवळे या गावातील दिलीप ढवळे या शेतकऱ्याने फसवणूक झाल्याने १२ एप्रिल २०१९ रोजी गळफास घेवून आत्महत्या केली होती.

उस्मानाबाद -जिल्ह्यातील कसबे तडवळे या गावातील दिलीप ढवळे या शेतकऱ्याने आत्महत्या केली होती. या शेतकऱ्याने फसवणूक झाल्याने १२ एप्रिल २०१९ ला गळफास घेवून आत्महत्या केली होती. घटनास्थळी जप्त केलेल्या चिठ्ठीत एका चिट्ठीत त्यांनी आत्महत्येस ओमप्रकाश राजेनिंबाळकर व वसंत दादा बँकेचे चेअरमन विजय दंडनाईक जबाबदार असल्याचा उल्लेख होता. त्यानुसार पोलिसांनी तब्बल ५ महिने तपास केल्यांनतर ओमराजे राजेनिंबाळकरावर गुन्हा नोंद केला आहे.

तेरणा कारखान्याने कर्जापोटी ढवळे यांची जमीन वसंतदादा सहकारी बँकेकडे गहाण ठेवली होती. कारखान्याने कर्ज न भरल्याने बँकेने ढवळे यांची जमीन लिलावात काढली होती. या तणावामुळे ढवळे यांनी शेतात गळफास घेऊन आत्महत्या केली. यावेळी ढवळे यांच्या खिशात २ वेगवेळ्या चिठ्ठ्या सापडल्या. त्यातील एका चिठ्ठीत त्यांनी आत्महत्येस ओमप्रकाश राजेनिंबाळकर व वसंत दादा बँकेचे चेअरमन विजय दंडनाईक जबाबदार असल्याचा उल्लेख होता. त्यांनतर त्यांचा पुतण्या राज ढवळे यांनी पोलिसात गुन्ह नोंद करण्याची तक्रार केली होती. त्यानुसार पोलिसांनी तब्बल ५ महिने तपास केल्यांनतर गुन्हा नोंद केला आहे.

हेही वाचा- उस्मानाबाद : शिवसेनेचे उमेदवार राजेनिंबाळकरांनी आर्थिक फसवणूक केली, चिठ्ठी लिहून शेतकऱ्याची आत्महत्या

तर दुसऱ्या चिठ्ठीत १३ शेतकऱ्यांनी तेरणा कारखाना बाबत शिवसेना पक्ष प्रमुख उद्धव ठाकरे यांना भेटण्याचा प्रयत्न केला. मात्र भेट झाली नाही असे सांगत व्यथा मांडल्या आहेत. त्याचबरोबर शिवसेनेचे लोकसभा उमेदवार ओमप्रकाश राजेनिंबाळकर यांना मतदान न करण्याचे आवाहन देखील केले होते.

हेही वाचा- दहा दिवसानंतर 'त्या' शेतकऱ्याचा अस्थीकलश उद्धव ठाकरेंना पाठवणार

शेतकरी ढवळेंच्या आत्महत्येचा मुद्दा लोकसभा निवडणुकीत चांगलाच गाजला होता. शरद पवार यांनी स्वतः त्यांच्या घरी जाऊन चौकशी केली होती. तर उद्धव ठाकरे यांनी जाहीर भाषणात शेतकऱ्याला न्याय देण्याचे आश्वासन दिले होते. या प्रकरणी रविवारी खासदार ओमप्रकाश राजेनिंबाळकर यांच्या वर गुन्हा दाखल करण्यात आला आहे.