नाशिक - जून महिना संपत आला तरी अद्याप पावसाने कृपा केली नाही. याचा परिणाम सर्वसामान्य नागरिकांना जाणवू लागला आहे. गेल्या ८ दिवसांपासून भाजीपाल्यांच्या किंमतीत मोठ्या प्रमाणात वाढ झाली आहे. पुढे पाऊस जर लांबणीवर गेला तर तर भाजीपाल्यांचे भाव आणखी वाढण्याची शक्यता वर्तवण्यात येत आहे.
नाशिक जिल्ह्यात पावसाने दांडी मारल्याने याचा परिणाम भाजीपाल्यावर दिसून येत आहे. बाजारात भाजी पाल्यांची आवक कमी झाल्याने भाव वाढले आहेत. ग्राहकसुद्धा वाढलेल्या भाजीपाल्याकडे पाठ फिरवत असल्याचे चित्र किरकोळ बाजारात दिसत आहे. नाशिक जिल्ह्यातील 9 तालुक्यात शासनाने दुष्काळ जाहीर केला आहे. अनेक गाव वाड्यावर टँकरने पाणीपुरवठा केला जात आहे. पाण्याअभावी गावातील अनेक विहीरी, नाले, तलाव कोरडे पडले आहेत. किरकोळ बाजारात मेथीची जुडी 80 रुपये तर कोथिंबीरची जुडी 90 रुपयाने खरेदी करावी लागत आहे.