नाशिक - कारमधून गांजा शहरात विक्री करण्यासाठी आणणाऱ्या तीन संशयितांना गुन्हे शाखेने जेरबंद केले. नाशिकच्या तपोवनातील जलशुद्धीकरण केंद्राजवळ पोलिसांना आरोपींना पकडण्यात यश आले. या कारवाईमध्ये स्विफ्ट गाडीसह ६२ किलो गांजा असा एकूण आठ लाख दहा हजारांचा मुद्देमाल जप्त करण्यात आला आहे.
हेही वाचा - त्र्यंबकेश्वर परिसरात राज्य उत्पादन शुल्क विभागाचा छापा; लाखो रुपयांचा मद्यसाठा जप्त
नाशिक गुन्हे शाखा १ चे पोलीस उपनिरीक्षक बलराम पालकर यांना काही संशयीत नाशिक शहरात गांजा विक्री करण्यासाठी घेऊन असल्याचे समजले. त्याअनुषंगाने गुन्हे शाखा क्रमांक १ चे वरिष्ठ पोलीस निरीक्षक आनंद वाघ यांच्या मार्गदर्शनाखाली सापळा रचून संशयीत धनराज पवार (रा.निफाड), युवराज मोहिते (रा.विडीकामगारनगर, आडगाव), प्रशांत नारळे (रा.कुमावतनगर, पंचवटी) यांना तपोवनातील जलशुद्धीकरण केंद्राजवळ पकडले. गाडी क्रमांक एमएच १२ एफयु ४०२० सह जवळपास ६२ किलो गांजा असा एकूण आठ लाख दहा हजार रुपयांचा मुद्देमाल ताब्यात घेतला आहे.