नाशिकमधील वैतरणा प्रकल्पाच्या प्रवेशद्वारावर कोसळली दरड

मुंबईला वीज पुरवठा करणाऱ्या वैतरणा जलविद्युत प्रकल्पाच्या मुख्य दरवाजा भागात डोंगरावरील दरड कोसळली आहे.

नाशिक - इगतपुरी आणि घोटी परिसरात जोरदार पावसामुळे मुंबईला वीज पुरवठा करणाऱ्या वैतरणा जलविद्युत प्रकल्पाच्या प्रवेशद्वारावर दरड कोसळली. त्यामुळे मोठ्या प्रमाणात डोंगरावरील पाण्याचा प्रवाह प्रकल्पाच्या आतमध्ये घुसला आहे.

इगतपुरी पासून जवळच वैतरणा धरणावर जलविद्युत प्रकल्प कार्यरत आहे. धरणाच्या पाण्याच्या वापर करुन येथे वीज निर्मिती करण्यात येते. हा जलविद्युत प्रकल्प डोंगराच्या कडेला आहे. बुधवारी रात्रीपासून या परिसरात ढगफुटीसारखा जोरदार पाऊस झाला. त्यामुळे डोंगरावरील दरडीचा एक मोठा भाग थेट जलविद्युत प्रकल्पाच्या मुख्य प्रवेशद्वारावर कोसळला. यात प्रकल्पाशेजारी असणाऱ्या २ पोलीस चौक्या उद्ध्वस्त झाल्या. तसेच पोलिसांच्या २ रायफली आणि २ मोटारसायकल सह येथील कर्मचाऱ्यांच्या ४ दुचाक्या ही वाहून गेल्या आहेत. चौकीत असलेल्या पोलीस आणि सुरक्षा रक्षक प्रसंगावधान दाखवत बाहेर पडल्याने सुदैवाने कुठलीही जीवितहानी झाली नाही.

पावसामुळे कामगारांना सेवा देणारे मोठे वाहनमध्येच अडकले आहे. त्यामुळे वीज निर्मिती केंद्राकडे जाणार रस्ता बंद झाल्याने वीज निर्मितीचे काम थांबवण्यात आले आहे. पोलीस अधीक्षक आरती सिंग, प्रांताधिकारी राहुल पाटील, तहसीलदार वंदना मांडगे या अधिकाऱ्यांनी घटनास्थळी भेट देऊन पाहणी केली.