नाशिक- येथील दसक आनंद बुद्धविहारच्या सभागृहाला महापालिकेने कुलूप लावल्याप्रकरणी नगरसेवक प्रशांत दिवे यांच्यासह संतप्त नागरिकांनी विभागीय अधिकारी सोमनाथ वाडेकर यांना त्यांच्या कार्यालयात कडी लावून डांबून ठेवल्याचा प्रकार समोर आला आहे.
समाज मंदिराऐवजी बुद्धविहारच्या सभागृहालाच कुलूप लावल्याने नागरिक संतप्त झाले आहेत. दरम्यान, समाज मंदिराऐवजी बुद्धविहाराच्या सभागृहाला कुलूप लावण्याची चूक लक्षात आल्यानंतर पालिकेकडून कुलूप काढण्यात आले. या प्रकरणामुळे विभागीय कार्यालयात काही काळ गोंधळ निर्माण झाला होता.
नागरिकांनी गावठाणांच्या जागेत ५० ते ६० वर्षांपूर्वी बुद्धविहार उभारले असून त्या शेजारीच महाराष्ट्र शासनाच्या दलित वस्ती निधीतून सभागृह उभारण्यात आले आहे. बुद्धविहारमागे महापालिकेचे समाज मंदिर असून महापालिकेचे अधिकारी व कर्मचारी न्यायालयाच्या आदेशानुसार सोमवारी समाजमंदिराला कुलूप लावण्यासाठी गेले असता त्यांनी बुद्धविहाराच्या सभागृहालाच कुलूप लावले.
