नाशिक -दिंडोरी तालुक्यातील आदिवासी भाग असलेल्या गांडोळे येथे गावातील शिक्षणप्रेमी युवकांच्या मदतीने शिक्षकांनी वाचनालय सुरू केले आहे. दुर्गम भागात पोहोचवलेल्या या सुविधेमुळे शिक्षकांचे सर्वत्र कौतुक होत आहे.
कोरोनाच्या प्रादुर्भावामुळे सर्वत्र शाळा बंद आहेत. त्यामुळे विद्यार्थ्यांचे शैक्षणिक नुकसान टाळण्यासाठी ऑनलाइन शिक्षण सुरू करण्यात आले. मात्र, दिंडोरी तालुक्याचा पश्चिम भाग अतिशय दुर्गम व आदिवासी लोकवस्तीचा आहे. येथे मोबाइल टॉवर नसल्याने इंटरनेट सेवा पुरेशी नाही. त्यामुळे येथील विद्यार्थ्यांचे शैक्षणिक नुकसान होत होते. जिल्हा परिषद गांडोळे शाळेच्या शिक्षकांच्या ही बाब लक्षात येताच त्यांनी गावातील शिक्षण प्रेमी युवकांशी संवाद साधत विद्यार्थी वाचनालय सुरू करण्याचा मानस व्यक्त केला. त्यास ग्रामस्थांनी सकारात्मक प्रतिसाद देत शालेय व्यवस्थापन समिती अध्यक्ष धनराज भोये यांच्या सहकार्याने मोहन जाधव यांनी स्वत:च्या घराची एक खोली विद्यार्थी वाचनालयासाठी उपलब्ध करून दिली.