नाशिक- शनिवारी मध्यरात्रीपासून पावसाचा जोर पुन्हा वाढल्याने जिल्ह्यातील धरणांच्या जलसाठ्यात मोठ्या प्रमाणात वाढ झाली आहे. गोदावरीसह अन्य नद्यांनी धोक्याची पातळी ओलांडली आहे.
गोदावरी नदीला महापूर येण्याची शक्यता
त्र्यंबकेश्वर तालुक्यातील गंगापूर धरणाच्या पाणलोट क्षेत्रात दिवसभरात तब्बल 260 मिलिमीटर पाऊस झाल्याने धरण्याच्या पातळीत झपाट्याने वाढ झाली आहे. धरणातून 20 हजार क्युसेक विसर्ग सुरू असल्याने गोदावरीला पूर आला आहे. जिल्हा प्रशासनाने नदीकाठच्या गावांना सतर्कतेचा इशारा दिला आहे.
धरणातून मोठ्या प्रमाणात पाण्याचा विसर्ग सुरू झाल्याने नाशिकचा सराफ बाजार या मुख्य बाजारपेठेत पाणी शिरले आहे. बाजारपेठेत अचानक शिरलेल्या पाण्यामुळे व्यवसायिकांची तारांबळ उडाली. चांदोरी-सायखेडा पूल पाण्याखाली गेल्या असल्याने तेथील वाहतूक बंद झाली आहे. त्यामुळे गोदाकाठच्या गावांचा संपर्क तुटला आहे.