लग्नासाठी 'ब्लॅकमेलिंग', गोदावरी नदीत उडी घेऊन तरुणीची आत्महत्या

शिवाजी केदारे (वय ३८) हा व्यक्ती मागील काही दिवसांपासून रोशनीला आपल्याशी लग्न करण्यासाठी वारंवार त्रास देत होता. त्याने रोशनीच्या काही फोटो काढले होते. त्या फोटोचा आधार घेऊन तो तिला लग्नासाठी 'ब्लॅकमेल' करत होता. महत्वाचे म्हणजे, रोशनीचा विवाह या महिन्याच्या २० तारखेला होणार होता.

नाशिक- गंगापूरच्या एका २० वर्षीय तरुणीने शिवाजी केदारे या व्यक्तीकडून लग्नासाठी होत असलेल्या 'ब्लॅकमेलिंग'ला कंटाळून गोदावरी नदीत उडी मारुन आत्महत्या केल्याची धक्कादायक घटना उघडकीस आली आहे. रोशनी हिरे असे आत्महत्या केलेल्या तरुणीचे नाव आहे. याप्रकरणी मृत तरुणीच्या आईने गंगापूर पोलीस ठाण्यात गुन्हा दाखल केल्यानंतर पोलिसांनी संशयिताला ताब्यात घेतले आहे.

मृत रोशनी हिच्या आईने दिलेल्या तक्रारीनुसार, शिवाजी केदारे (वय ३८) हा व्यक्ती मागील काही दिवसांपासून रोशनीला आपल्याशी लग्न करण्यासाठी वारंवार त्रास देत होता. त्याने रोशनीच्या काही फोटो काढले होते. त्या फोटोचा आधार घेऊन तो तिला लग्नासाठी 'ब्लॅकमेल' करत होता. महत्वाचे म्हणजे, रोशनीचा विवाह या महिन्याच्या २० तारखेला होणार होता.

तेव्हा संशयिताने रोशनीच्या होणाऱ्या नवऱ्याचा तपास करून रोशनी आणि माझे प्रेमसंबध होते असे सांगितले. तसेच त्याने त्याच्याजवळ असलेली फोटो होणाऱ्या नवऱ्याला दाखवले. त्यामुळे रोशनीचा विवाह धोक्यात आला. परिणामी रोशनीने संशयिताच्या ब्लॅकमेलिंगला कंटाळून गोदावरी नदीमध्ये उडी घेत आत्महत्या केली.

रोशनी हिच्या आईने गंगापूर पोलीस ठाण्यात संशयित शिवाजी याच्याविरोधात आत्महत्येस प्रवृत्त केल्याप्रकरणी गुन्हा दाखल केला. तेव्हा पोलिसांनी शिवाजी केदारे याला ताब्यात घेतले. याबाबत अधिक तपास पोलिस निरिक्षक नितीन पवार करत आहेत.