नाशिक- शहरामध्ये आता आपल्याला फ्लॉवर पार्क पाहायला मिळणार आहे. गुलशनाबाद म्हणून नाशिकची पुसली गेलेली ओळख आता पुन्हा एकदा मिळण्याची शक्यता आहे. उद्योजक शशिकांत जाधव यांच्या संकल्पनेतून हे फ्लॉवर पार्क उभारण्यात आले आहे.
फ्लॉवर पार्कचे उद्घाटन छत्रपती संभाजी महाराज यांच्या हस्ते करण्यात आले. या फ्लॉवर पार्कमध्ये दीड लाखाहून अधिक कुंड्या आहेत. हे फ्लॉवर पार्क ८ एकर परिसरात पसरलेले आहे. देशी तसेच आंतरराष्ट्रीय फुलांचा समावेश या पार्कमध्ये आहे. युरोप, रशिया, फ्रान्स, हॉलंडमध्ये सापडणाऱ्या पिटुनिया, झिनिया, डायनथस, अंथरीयम, कोलयास यापासून ते भारतात असलेल्या सूर्यफूल, बोगणवेलीया, झेंडू, गुलाब, कमळ इथपर्यंत जवळपास ५ लाख विविधरंगी फुले या पार्कमध्ये ठेवण्यात आली आहेत. नाशिककरांना या माध्यमातून जगभरातील फुले पाहता येणार आहेत.
हे पार्क हिवाळ्यातील ४ ही महिने पर्यटकांसाठी खुले असणार आहे. या पार्कमध्ये प्राण्यांच्या प्रतिकृती तसेच सेल्फी पॉइंट देखील आहे. मोर, गाडी, घर, हार्ट अशा विविध थीमच्या माध्यमातून ही फुले सजवण्यात आली आहेत. या व्यतिरिक्त पर्यटकांना या फुलांची इथंभूत माहिती मिळणार आहे. यासाठी अभ्यासू गाईड देखील ठेवण्यात आले आहेत. या माध्यमातून नाशिकच्या पर्यटनाला चालना मिळणार आहे. पहिल्याच दिवशी फ्लॉवर पार्कमध्ये आलेल्या पर्यटकांना या पार्कने भुरळ पाडली आहे. बच्चे कंपनींना तर या फ्लॉवर पार्कमध्ये फुलांच्या जाती फुलांचा सुगंध आणि वेगवेगळी फुले पाहण्याची ही पहिलीच वेळ होती. त्यामुळे पार्कमध्ये बच्चे कंपनीने सकाळपासूनच धमाल-मस्ती केली.