नाशिक - वेळोवेळी सूचना देऊनही कोरोनाकाळात नागरिक विनामास्क फिरत आहेत. यापुढे मास्क न घालणार्‍यांना थेट पोलीस ठाण्यात नेत त्याठिकाणी त्यांना दिवसभर बसवा, असे आदेश अन्न, नागरी पुरवठा व ग्राहक संरक्षण मंत्री आणि नाशिकचे पालकमंत्री छगन भुजबळ यांनी पोलिस यंत्रणेला दिले आहेत. तसेच मास्क न घालणार्‍यांकडून पोलीस आणि महापालिका दोघांनीही दुप्पट दंड आकारावा, असे निर्देशही त्यांनी दिले आहेत. जिल्हाधिकारी कार्यालयात सोमवारी कोरोना आढावा बैठक घेण्यात आली. यानंतर झालेल्या पत्रकार परिषदेत ते बोलत होते.
ते म्हणाले, दिवाळीच्या खरेदीसाठी रस्त्यावर झुंबड उडत आहे. मात्र, कोरोनाचे संकट असताना नागरिक विनामास्क फिरत आहेत. त्यामुळे कोरोनाचा संसर्ग वाढण्याची भीती आहे. ते बघता विनामास्क फिरणार्‍यांना पोलीस ठाण्यात नेऊन दिवसभर बसवा. जेणेकरुन विनामास्क फिरणार्‍यांना कडक संदेश मिळेल. पुढील काळात कोरोनाची त्सुनामी येऊ शकते. येणाऱ्या कोरोनाच्या संभावीत त्सुनामीची आम्ही तयारी करत आहोत. महापालिकेकडे 3000 बेड रिकामे आहेत. तर ग्रामीण भागात 12 हजार 500 बेड उपलब्ध आहेत. नाशिकमध्ये रुग्ण दुप्पट होण्याचा दर आणि मृत्यूदरही कमी झाला आहे.
सध्या रिकव्हरी रेट 92 टक्क्यांपेक्षा जास्त आहे. 'माझे कुटुंब माझी जबाबदारी' अभियानांतर्गत 62 लाख लोकांची तपासणी करण्यात आली. दिवाळीच्या फटाक्यांवर निर्बंध नसले तरी जनतेने काळजी घ्यावी. फटाक्यांच्या धुराचा फुफ्फुसांवर परिणाम होण्याची शक्यता आहे. त्यामुळे काळजी घेणे आवश्यक आहे. शाळा कॉलेज सुरू करण्याचे प्रयत्न आहेत. मात्र, अनेक शाळा कोव्हिड सेंटर म्हणून उपयोगात आणल्या जात आहे.