नंदुरबारमध्ये कोरोनामुळे मृत्यूची संख्या 8 वर; सहा जण कोरोनामुक्त

नंदुरबार जिल्ह्यात कोरोनाबाधितांचा आकडा 163 असून त्यापैकी 8 जणांचा मृत्यू झाला आहे. आतापर्यंत 80 जणांनी कोरोनावर मात केली आहे. तसेच उर्वरित 74 कोरोनाबाधितांवर उपचार सुरु आहेत.

नंदुरबार -जिल्ह्यात सलग दुसर्‍या दिवशीही कोरोनामुळे एक मृत्यू झाला आहे. यामुळे जिल्ह्यातील मृतांचा आकडा 8 वर पोहोचला आहे. वाढणाऱ्या मृत्यूच्या संख्येमुळे जिल्हावासियांची चिंता वाढली आहे. सायंकाळी 6 जणांनी कोरोनावर मात केल्याने चिंताग्रस्त नंदुरबारकरांना काहीसा दिलासा मिळाला. जिल्ह्यात कोरोनाचा आठवा बळी गेला असला तरी बाधितांपैकी बरे होणार्‍या रुग्णांची संख्याही वाढली आहे.

नंदुरबार जिल्ह्यात जून महिन्यात कोरोनाच्या आकडेवारीने शंभरी पार केली. सध्या रुग्णसंख्या 163 वर पोहोचली आहे. दररोज येणार्‍या अहवालांमध्ये काही जण पॉझिटिव्ह तर काही निगेटिव्ह येत असल्याने थोडी चिंता वाढतेय तर थोडा दिलासा मिळत आहे.

नंदुरबार तालुक्यातील धुळवद येथील एका 47 वर्षीय कोरोनाबाधित पुरूषाचा बुधवारी उपचारादरम्यान मृत्यू झाला. या घटनेला एक दिवस उलटत नाही, तितक्यात गुरुवारी पुन्हा कोरोनामुळे आणखी एक बळी गेला. नंदुरबार येथील मंगळबाजार परिसरात राहणारी 45 वर्षीय महिला सहा दिवसांपूर्वीच कोरोनाबाधित आढळली होती. तिच्यावर जिल्हा रुग्णालयात उपचार सुरू होते. या उपचारादरम्यान गुरुवारी महिलेचा मृत्यू झाला. यामुळे नंदुरबारकरांमध्ये कोरोनाची चिंता वाढली. जिल्ह्यात कोरोनामुळे 8 मृत्यू झाल्याने खबरदारी घेणे अधिक महत्वाचे आहे.

गुरुवारी सायंकाळी सहा जण कोरोनामुक्त झाल्याची माहिती पुढे आल्याने जिल्हावासियांना काहीसा दिलासा मिळाला. नंदुरबार येथील कोकणीहिल परिसरातील 1 जण, सिंधी कॉलनीतील 2 जण व पयलनगरातील 1 जण, तळोदा तालुक्यातील आमलाड येथील 1 व शहादा येथील गणेश नगरातील 1 जण अशा सहा जणांनी कोरोनावर मात केली आहे. संसर्गमुक्त झाल्याने या सहा जणांना जिल्हा रुग्णालयातून रात्री घरी सोडण्यात आले.

नंदुरबार जिल्ह्यात कोरोनाबाधितांचा आकडा 163 असून त्यापैकी 8 जणांचा मृत्यू झाला आहे. आतापर्यंत 80 जणांनी कोरोनावर मात केली आहे. तसेच उर्वरित 74 कोरोनाबाधितांवर उपचार सुरू आहेत. त्यापैकी 2 रुग्ण नाशिक, 2 रुग्ण धुळे येथे उपचार घेत असून एक रुग्ण बालक असल्याने त्याला पुढील उपचारासाठी नाशिक येथे पाठविण्यात आले आहे.

आतापर्यंत जिल्ह्यातून 1952 जणांचे नमुने घेण्यात आले असून त्यापैकी 1719 जणांचे अहवाल निगेटिव्ह आले आहेत. तर 163 जण पॉझिटिव्ह असून 49 जणांचे अहवाल अद्याप प्रतिक्षेत आहेत. आयसोलेशन वॉर्डमध्ये 287, विलगीकरण कक्षात 1192, होम क्वॉरंटाइनमध्ये 40, वॉर्ड अ‍ॅडमिटमध्ये 10 तर रूग्णालय पथकात 423 जणांचा समावेश आहे.