विशेष : 22 वर्षापासून ना वेतन, ना पगार; कंटाळलेल्या शिक्षकाने शाळेतच थाटला संसार!

22 वर्षापासून पगार आणि कोणत्याही प्रकारचे वेतन न मिळाल्यामुळे नांदेड येथील शिक्षकाने शाळेतच संसार मांडला आहे. भास्कर लोखंडे असे या शिक्षकाचे नाव आहे. ते नांदेड जिल्ह्यातील अर्धापूर शहरातील रावसाहेब देशमुख नॅशनल इन्स्टिट्यूट ऑफ एज्युकेशन अँड डेफनेस संचलित, मिनाक्षी देशमुख गर्ल्स माध्यमिक व उच्च माध्यमिक विद्यालयात कार्यरत आहेत.

नांदेड - जिल्ह्यातील अर्धापूर शहरातील रावसाहेब देशमुख नॅशनल इन्स्टिट्यूट ऑफ एज्युकेशन अँड डेफनेस संचलित, मिनाक्षी देशमुख गर्ल्स माध्यमिक व उच्च माध्यमिक विद्यालयामध्ये गेल्या 22 वर्षापासून शिक्षक म्हणून कार्यरत आसलेल्या शिक्षकाला हक्काच्या वेतनासाठी वणवण भटकंती करावे लागत आहे. वेतन आणि पगाराविना आर्थिक अडचणीत दिवस काढले. अखेर कंटाळलेल्या शिक्षकाने वेतन आणि अनामत रक्कम परत मिळावी या मागणीसाठी आपला संसार चक्क शाळेतच थाटला आहे. त्यांनी संसार उपयोगी साहित्य आणि मुलांसोबत आपले बिऱ्हाड शाळेतच थाटले आहे.

आपल्या मागण्या पूर्ण करण्यासाठी विविध मार्गाने आंदोलन, उपोषण, निवेदन, आदी मार्गाने आंदोलन करण्यात येते. कधी गांधीगिरी करून आपल्या मागण्यांकडे लक्ष वेधण्यात येते. ज्या शाळेत अध्यापनाचे काम केले त्याच शाळेत वेतनासाठी शिक्षकाला संसार थाटवा लागला आहे. सदरील पीडित शिक्षक आपल्या मुलासह गांधीगिरी करून सोमवारी (5 ऑक्टोबर) सायंकाळपासून आंदोलन करित आहेत. या अनोख्या आंदोलनाने जिल्ह्याचे लक्ष वेधले.

नांदेड येथील माजी आमदार डी. आर. देशमुख यांचे अर्धापूर शहरांत गेल्या तीन दशकांपासून मीनाक्षी देशमुख गर्ल्स माध्यमिक व उच्च माध्यमिक विद्यालय कार्यरत आहे. या शाळेत २२ वर्षांपुर्वी भास्कर लोखंडे हे इंग्रजीचे विषयासाठी शिक्षक म्हणून रूजू झाले आहेत. शाळा अनुदानित झाल्यावर पूर्ण वेतन मिळेल. या आशेवर अध्यापनाचे काम नेटाने करित आहेत. तसेच कुटुंबाला अर्थिक आधार मिळावा यासाठी खासगी शिकवण्या घेऊन दिवस काढली. तसेच वेतनाची धास्ती घेत त्यांच्या पत्नीचाही दुर्धर आजाराने मृत्यू झाला.

गेल्या सहा महिन्यांपासून ताळेबंद असल्यामुळे खासगी शिकवण्या बंद झाल्या आहेत. घरखर्च आणि मुलांचे शिक्षण आदी खर्च भागत नाही. वेतनही नाही. अशी बिकट परिस्थिती उद्भविल्याने वेतन मिळावे, यासाठी पीडित शिक्षकाने आपला संसार चक्क शाळेतीलच एक वर्गाच्या खोलीत थाटला आहे. यात संसार उपयोगी साहित्य, पंखा, गॅस, धान्य, आदी. रोज लागणाऱ्या वस्तू आहेत.

• आर्थिक अडचणीमुळे पत्नीच्या आजाराला खर्च करू न शकल्याची खंत -

मी गेल्या 22 वर्षांपासून शाळेत शिक्षक म्हणून कार्यरत आहे. शाळा अनुदानित झाल्यावर वेतन मिळेल, अशी अपेक्षा होती. मात्र, माझा अधिकार डावलण्यात आला. आर्थिक परिस्थितीमुळे पत्नीच्या आजारवर खर्च करू शकलो नाही. यातच तिचा मृत्यू झाला. वेळोवेळी निवेदने दिली. संस्था चालकांकडे दाद मागितली. तसेच न्यायालयात गेलो. सध्या बिकट परिस्थिती उद्भवल्याने माझ्या मुलांसह शाळेतील वर्ग संसार थाटला आहे. मला मानसिक त्रास देण्यात आला. वेतन आणि अनामत रक्कम मिळण्यासाठी शाळेत संसार थाटला आहे. रिक्त झालेल्या जागी नियुक्त करून वेतन देण्यात यावे, अशी वेळोवेळी मागणी केली. मात्र, मला न्याय मिळाला नाही. आता मी 'करो या मरो' मानसिकतेत असून मला न्याय मिळेपर्यंत शाळेतच माझा संसार राहील. माझा आवाज मुख्यमंत्री, उपमुख्यमंत्री आणि शिक्षणमंत्र्यांनी ऐकावा.

- भास्कर लोखंडे (पीडित, शिक्षक)

• न्यायप्रविष्ट असल्याने सहशिक्षक लोखंडे वर्तणूक बेजबाबदारपणाची -
  
  भास्कर लोखंडे यांनी 2016मध्ये अर्थशास्त्र आणि सहकार या रिक्त जागेवर मला नेमणूक देण्यात यावी, असा आग्रह धरला होता. मात्र, नियमानुसार असे करता येत नाही. असे असतानाही लोखंडे यांनी उच्च न्यायालयात संस्थेच्या विरोधात याचिका दाखल केली आहे. प्रकरण न्यायप्रविष्ट असताना कोणतीही कार्यवाही उचित नाही. लोखंडे यांनी आपल्या परिवारासह शाळेत ठाण मांडणे बेजबाबदारपणाचे आहे.

- डॉ. ज्योती देशमुख, संस्थेच्या कोषाध्यक्षा