नांदेड - जिल्ह्यातील मुदखेड येथे पोलीस उपनिरीक्षकाला भर रस्त्यात शिवीगाळ आणि धक्काबुक्कीचा प्रकार समोर आला आहे. मुदखेड येथील बाजारात जमावाने अक्षरशः धुडगूस घातला. या सर्व प्रकाराचा व्हिडिओ व्हायरल झाला आहे. यानंतर नांदेडमध्ये पोलिसांचा धाक राहिला नसल्याची जोरदार चर्चा आहे.
पोलीस उपनिरीक्षक दर्जाच्या अधिकाऱ्याला भर बाजारपेठेत शिविगाळ करण्यात आल्याने मुदखेडमध्ये खळबळ उडाली आहे. पोलीस ठाणे जवळ असल्याने मोठा अनर्थ टळला अन्यथा मुदखेडमध्ये काहीही घडले असते, अशी चर्चा होत आहे. दरम्यान पोलीस उपनिरीक्षक नारायण शिंदे यांनी परवा अवैध कत्तलखाना चालवणाऱ्यांवर गुन्हा दाखल केला होता. त्या रागातुन कुरेशी गटाने पोलीस उपनिरीक्षकाला एकटे पाहुन त्यांना धक्काबुक्की आणि शिवीगाळ करत जीवे मारण्याची धमकी दिली. याचा व्हिडीओ व्हायरल होऊनही पोलिसांनी मारहाण करणाऱ्या टोळक्यावर काहीही कारवाई केलेली नाही. राजकीय दबावातून पोलीस शांत बसल्याची धक्कादायक माहिती मिळत आहे. या घटनेमुळे मुदखेड पोलीस सध्या प्रचंड मानसिक दडपणाखाली आहेत. या सगळ्या प्रकाराकडे वरिष्ठांनी लक्ष द्यावी, अशी मागणी होत आहे.
