नागपूर - मुख्यमंत्री देवेंद्र फडणवीस आणि केंद्रीय मंत्री नितीन गडकरी यांच्या नागपूर शहरात भाजपने 2014 सालच्या विजयाची पुनरावृत्ती करण्यासाठी कंबर कसली आहे. तर दुसरीकडे देशातील सर्वात जुना पक्ष असलेला काँग्रेस अजूनही गटबाजीच्या फासात अडकल्याने विखुरलेल्या परिस्थितीतून सावरलेला नाही. त्यामुळे ही विधानसभा निवडणूक काँग्रेससाठी जड जाणार हे स्पष्ट झाले आहे. शिवसेना राष्ट्रवादी आणि वंचित बहुजन पक्षाचा फारसा प्रभाव शहरात नसल्याने भाजप विरुद्ध काँग्रेस यांच्यातच सामना रंगणार आहे.
विधानसभा निवडणुकीचे बिगुल वाजले आहे. नागपूर शहरात प्रचाराच्या रणधुमाळीला देखील सुरूवात झाली आहे. भाजपने लोकसभा निवडणुकीच्या निकालानंतर अतिशय नियोजनबद्ध पद्धतीने प्रचाराचा कार्यक्रम राबवायला सुरूवात केली आहे. ज्यामध्ये पहिल्या टप्यात कार्यकर्त्यांच्या भेटी-गाठी घेतल्या जात असून, विधानसभानिहाय कार्यकर्त्यांचे मत जाणून घेतले जात आहे. ज्याच्या निष्कर्षातून शहरातील काही उमेदवारांचे तिकीट कापले जाण्याची दाट शक्यता आहे. नागपूर शहरात एकूण 6 विधानसभा मतदारसंघ आहेत. त्या सर्व सहाच्या सहा मतदारसंघावर भाजपचे निर्विवाद वर्चस्व आहे.
दक्षिण-पश्चिम मतदारसंघाचे नेतृत्व स्वतः मुख्यमंत्री देवेंद्र फडणवीस करतात. तर कृष्णा खोपडे, सुधाकर देशमुख, विकास कुंभारे सारखे अनुभवी आमदार आहेत. तर डॉ. मिलिंद माने आणि सुधाकर कोहळे यांच्यासारखे नवखे आमदार देखील आहेत. ज्यापैकी मध्य नागपूरचे आमदार विकास कुंभारी, पश्चिम नागपूरचे आमदार सुधाकर देशमुख आणि दक्षिण नागपूरचे आमदार सुधाकर कोहळे यांची उमेदवारी धोक्यात असल्याचे राजकीय विश्लेषक सांगत आहेत. तर दुसरीकडे काँग्रेस पक्ष यावेळी जुन्या उमेदवारांवर डाव खेळेल की नव्या उमेदवारांना संधी देईल यावरदेखील काँग्रेसचे यश अवलंबून रहाणार आहे.
सलग दोन वेळा पराभवाची चव चाखलेल्या उमेदवारांना यावेळी संधी देऊ नका, असा काँग्रेसमधून सूर उमटत आहे. कोणत्या उमेदवाराला संधी मिळेल हेदेखील बघणे तेवढेच महत्त्वाचे आहे. सध्या नागपुरात माजी खासदार विलास मुत्तेमवारांसह नितीन राऊत आणि नुकतेच निलंबन रद्द करून काँग्रेसमध्ये पुनरागमन करणारे सतीश चतुर्वेदी यांचे गट सक्रिय आहेत. या गटातटाच्या राजकारणामुळे नागपुरात काँग्रेस पक्ष भाजपसमोर टिकाव धरेल का हे देखील पाहणे महत्त्वाचे ठरणार आहे.
सर्वात महत्वाचे म्हणजे लोकसभा निवडणुकीत काँग्रेस उमेदवार नाना पटोले यांनी पक्षाला एकसंघ करण्याचा प्रयत्न केला आहे. मात्र, निवडणुकीत अपयश आल्यानंतर तेदेखील नागपूर शहर काँग्रेसच्या कारभारापासून दूर असल्याचे चित्र बघायला मिळते आहे. याशिवाय नागपूर शहरात शिवसेना, राष्ट्रवादी आणि वंचित बहुजन आघाडीसारख्या पक्षांचा प्रभाव शून्य आहे. शिवसेना पूर्व किंवा दक्षिण नागपूर मतदारसंघातून निवडणूक लढण्यासाठी उत्सुक असली तरी भाजप त्यांना कुठल्याही परिस्थितीत या जागा सोडणार नाही असं सध्या दिसतयं. तर वंचित बहुजन आघाडी किती मतांची मजल मारेल यावरसुद्धा काँग्रेसच्या गोळा बेरजेचे राजकारण अवलंबून असणार आहे.
