नागपूर - शहरात फिरायला आलेल्या २ एलआयसी एजंट मित्रांचा मोहगाव येथील झिलपी तलावात बुडून मृत्यू झाला आहे. या परिसरातील काही नागरिकांना तलावाच्या काठावर २ मोटारसायकली बेवारस आढळून आल्या आणि पाण्यावर प्रेत तरंगताना दिसले. त्यामुळे ही घटना उघडकीस आली. कमलेश रमेश शाहकार आणि देबोजित कल्याणजी बॅनर्जी, असे या मृतांची नावे आहेत. ते दोघेही मागील १० वर्षांपासून एलआयसीचे काम करत असल्याची माहिती समोर येत आहे.
शुक्रवारी सकाळी ९ वाजता दोघेही आपापल्या मोटारसायकली घेऊन हिंगणा तालुक्यातील मोहगाव शिवारात असलेल्या झिलपी तलावावर पोहोचले. तिथे त्यांनी काही वेळ फोटो काढले. त्यानंतर ते घरच्यांशी मोबाईलवर बोलले,असल्याची माहिती मिळते. दुपारी २ वाजल्यानंतर मात्र, दोघांचे फोन बंद झाले. आज दुपारी २ वाजण्याच्या सुमारास या परिसरातील काही लोकांना त्यांचे मृतदेह पाण्यावर तरंगताना दिसले. त्यामुळे मोहगावचे सरपंचांनी याची माहिती हिंगणा पोलिसांना दिली. सहायक पोलीस निरीक्षक नितीन कुंभारे आणि टीम घटनास्थळी दाखल झाले. त्यांनी दोघांचेही मृतदेह पाण्याबाहेर काढले. त्यांच्या कपड्यात सापडलेल्या ओळखपत्रावरुन त्यांची ओळख पटवली आणि नातेवाईकांना याबाबत माहिती दिली.