नागपुरात आता 31 मार्चपर्यंत संचारबंदी, पालकमंत्र्यांचे निर्देश

नागपूर शहर व जिल्ह्यात कोरोनाग्रस्तांचा आकडा आटोक्यात येत नसल्याने पालकमंत्री डॉ. नितीन राऊत यांनी संचारबंदी वाढ केली आहे. आता नागपुरात 31 मार्चपर्यंत संचारबंदी लागू असणार आहे.

नागपूर- नागपुरात बाजारपेठेच्या वेळेत बदल करून निर्बंध 31 मार्चपर्यंत वाढवण्यात आले आहे. यात आज (दि. 20 मार्च) विभागीय आयुक्त कार्यलयात बैठक घेण्यात आली. या बैठकीनंतर त्यांनी प्रसारमाध्यमांशी बोलतांना पालकमंत्री नितीन राऊत यांनी माहिती दिली आहे.

या बैठकीला केंद्रीय मंत्री नितीन गडकरी यांनी ऑनलाइन सहभाग नोंदवला. विरोधीपक्षनेते देवेंद्र फडणवीस हे प्रत्यक्ष बैठकीला उपस्थित होते. तसेच खासदार कृपाल तुमाणे यांच्यासह आमदार, तसेच व्यापारी मंडळींशी चर्चा करून हा निर्णय घेण्यात आल्याचे राऊत सांगितले.

नागपुरात कोरोनाची रुग्णसंख्या वाढत आहे. यामुळे निर्बंध आणखी कडक करण्यात आले आहे. यामध्ये पोलिसांनी कोरोना योद्धा म्हणून जबाबदारी स्वीकारण्याचे आवाहन पालकमंत्री यांनी केले आहे. यात नागरिकांना सहकार्य करण्याचे आवाहन करण्यात आले आहे. नागरिक ऐकत नसल्याचे दिसून येत असल्याने कडक निर्बंध लावण्यात आले. विनाकारण फिरणाऱ्यावर कारवाई केली जाणार असल्याच्या इशारा पालकमंत्री राऊत यांनी दिल्या असून त्यासंबंधिच्या सूचना पोलीस विभागाला दिल्या आहेत.

यात मागील तीन दिवसात सर्व दुकाने दुपारी 1 वाजेपर्यंत सुरू ठेवण्यात आले होते. यात बदल करण्यात आला असून 4 वाजेपर्यंत सर्व दुकाने सुरू ठेवण्यास परवानगी देण्यात आली आहे. रेस्टॉरंटच्या वेळात पूर्वी डायनिंगला बंदी होती. यात आता नव्याने 7 वाजेपर्यंत परवानगी असणार आहे. त्यानंतर रात्री 11 पर्यंत घरपोच (पार्सल) सुविधा सुरू असणार आहे.

यामध्ये शाळा महाविद्यालय बंद असणार आहे. पूर्व नियोजित परीक्षा घेतल्या जाणार आहे. विनाकारण फिरणाऱ्यावर सीसीटीव्ही कॅमेऱ्यातून नजर ठेवली जाणार आहे. यात गृहविलगिकरणात असतानाही फिरणाऱ्यांवर कडक कारवाई पोलीस करतील, असा इशारा देण्यात आला आहे. यात आणखी शिथिलतेबाबत पालिका आयुक्त, जिल्हाधिकाऱ्यांना घेऊन निर्णय घेणार असल्याचेही त्यांनी सांगितले. यात लसीकरणचे उद्दिष्ट दररोज 20 हजार, असे होते. यात वाढ करून 40 हजार दररोज करण्याच्या निर्णय घेण्यात आला आहे. यात शहरात आणि ग्रामीण भागात लसीकरण केंद्र 150 पर्यंत वाढवले जाणार आहे. सध्या या केंद्राची संख्या 70 ते 80 च्या घरात आहे.

यात नागपूर शहरात कोरोना स्ट्रेनचा रुग्ण अद्याप आढळल्याचा अहवाल आला नसला तरी यात काही नमुने हे दिल्लीला पाठवले आहे. अजून अहवाल प्रतीक्षेत आहे. यात केंद्रीय मंत्री नितीन गडकरी यांनी दिल्लीतून अहवाल मिळवण्यासाठी सहकार्य करण्याची विनंती करण्यात आली आहे.

हे असतील नियम

• सर्व दुकाने सायंकाळी 4 पर्यंत सुरू राहतील.
• रेस्टॉरंट सायंकाळी 7 पर्यंत सुरू राहतील. मात्र, घरपोच सेवा रात्री 11 वाजेपर्यंत सुरू असेल.
• अंमलबजावणीसाठी पोलीस विभागाला सक्त सूचना देण्यात आले आहेत.
• या काळात शाळा-महाविद्यालय बंद असतील. मात्र, परीक्षा होतील.

हेही वाचा -'लॉकडाऊन हा पर्याय नाही; पण, प्रशासनाला वाटत असेल तर विरोध नाही'

हेही वाचा -उपराजधानीत कोरोनाचा कहर; नागपुरात 3 हजार 796, तर पूर्व विदर्भात 4 हजार 501 बाधित रूग्ण