नागपूर - भाजप कार्यालयात नवीन शहर अध्यक्ष प्रवीण दटके यांचा आज पदग्रहण समारंभ होता. यादरम्यान सभागृहातील एमसीबीमध्ये अचानक शॉर्ट सर्किट झाला. त्यामुळे हॉलमध्ये आग लागल्याने कार्यकर्त्यांना हॉलमधून खाली उतरवण्यात आले. दरम्यान आग किरकोळ असल्याने लवकर आटोक्यात आली आहे.
भाजप कार्यालयात आज नवनियुक्त शहर अध्यक्ष प्रवीण दटके यांचा पदग्रहण समारोह आयोजित करण्यात आला होता. यावेळी खासदार आणि आमदारासह कार्यकर्त्यांची मोठी गर्दी कार्यालयाच्या सभागृहात जमली होती.
प्रवीण दटके यांच्या पदग्रहण समारंभात शॉर्ट सर्किटमुळे आग
प्रवीण दटके यांच्या भाषणाला सुरुवात झाली होती. त्यावेळी भाषण सुरु असताना हॉलमधील एमसीबीमध्ये अचानक ठिणगी उडाली आणि त्यातून धूर निघायला सुरुवात झाली. त्यामुळे धूर पाहून कार्यकर्ते आणि पाहुण्यांची चांगलीच तारांबळ उडाली होती. हॉलमध्ये गोंधळ होताना पाहून सर्व कार्यकर्ते आणि पाहुण्यांना सभागृहातून खाली उतरवण्यात आले.
दरम्यान अग्निशमन दलालाही माहिती देण्यात आली होती. मात्र अग्निशमन दलाची गाडी येईपर्यंत कार्यकर्त्यांनी सतर्कता बाळगत आग विझवण्याऱ्या सिलेंडरच्या साहाय्याने आग विझवली. आग किरकोळ असल्याने लवकर आटोक्यात आली आहे.
यावेळी कार्यक्रमाला आमदार सुधाकर कोहळे , कृष्णा खोपडे , सुधाकर देशमुख , खासदार विकास महात्मे उपस्थित होते. कार्यकर्त्यांनी सतर्कता दाखवल्याने मोठी दुर्घटना टळली आहे. विजपुरवठा खंडित झाल्याने सभागृहाच्या खालीच अंधारात उर्वरित पदग्रहण कार्यक्रम उरकण्यात आला आहे.
