नागपूर- नाभिकाने न विचारता मिशा कापल्याचा आरोप करत किरण ठाकूर याने नाभिकाविरोधात गुन्हा दाखल केला होता. या प्रकरणाने नवे वळण घेतले असून नाभिक संघटनेने किरण ठाकूरचे केशकर्तन करण्यावर बहिष्कार टाकण्याची तयारी केली आहे. कोणीही ठाकूर यांची दाढी आणि केस कापू नये, असे आवाहन संघटनेकडून केले जाणार आहे, त्यामुळे हे "मिशा' प्रकरण आणखीणच चिघळण्याची शक्यता आहे.
मिशीवर वस्तरा फिरवल्यानंतर वाद घातल्याने आणि पाहून घेण्याची धमकी मिळाल्याने संतप्त झालेल्या किरण ठाकूर यांनी पोलिसांत तक्रार केली. त्यांच्या तक्रारीवरून सलून मालकाविरुद्ध अदखलपात्र गुन्हा दाखल करण्यात आला. त्यानंतर राज्यभर या विषयाची चर्चा झाली. यामुळे नाभिक संघटना चांगल्याच भडकल्या आहेत.
किरण ठाकूर हे केवळ प्रसिद्धीसाठी मिशीवर "महाभारत' करीत असल्याचा आरोप नाभिक संघटनेने केला आहे. यापुर्वी अनेकदा ठाकूर यांनी दाढी-मिशा कापल्या आहेत. अनेक पोस्टरवर त्यांचे दाठी-मिशा नसलेले फोटो आहेत. त्यामुळे त्यांनी मिशा कापल्यावर त्याचा मोठा वाद करत पोलीस ठाण्यात तक्रार दिली. ठाकूर यांनी जाणिवपूर्वक प्रसिद्धीसाठी हा वाद निर्माण केल्याचा आरोप करत, या विरोधात आंदोलन करण्याचा इशारा संघटनेने दिला आहे.