मुंबई- जून महिना संपत आला तरी पावसाला सुरूवात झाली नाही. यामुळे मुंबईला पाणीपुरवठा करणाऱ्या धरणातील पाणीसाठा संपत आला आहे. तलावांतील पाणीसाठा झपाट्याने खालावत चालल्याने मुंबईकरांची पाण्याची चिंता वाढत चालली आहे. सध्या मुंबईला पाणीपुरवठा करणाऱ्या तलावांमध्ये फक्त वीस दिवस पुरेल इतकाच पाणीसाठा शिल्लक आहे. त्यामुळे भातसा आणि अप्पर वैतरणा या राज्य सरकारच्या तलावांतून मुंबईसाठी रोज अडीच हजार दशलक्ष लिटर राखीव पाणी साठ्याचा वापर सुरू करण्यात आला आहे. त्यामुळे मुंबईकरांनी पाणी जपून वापरावे असे, आवाहन पालिकेने केले आहे.
मुंबईला पाणीपुरवठा करणाऱ्या तलावांत मागील वर्षी समाधानकारक पाऊस झाला नाही. परिणामी पाणीसाठा कमी झाल्यामुळे पालिकेने नोव्हेंबर २०१८ पासून मुंबईत १० टक्के पाणीकपात लागू केली होती. दरवर्षी जूनच्या दुसऱ्या आठवड्यांपर्यंत पावसाची हजेरी लागते. मात्र, यंदा जूनच्या अखेरच्या आठवड्यांपर्यंतही पावसाचा पत्ताच नसल्याने पाणीपुरवठा करताना पालिका चिंतेत पडली आहे. मुंबईला सात धरणांतून पाणीपुरवठा केला जातो. त्यापैकी मोडकसागर, तानसा, मध्य वैतरणा, तुळशी आणि विहार या धरणांमध्ये फक्त ७३ हजार दशलक्ष लिटर पाणीसाठा शिल्लक आहे. त्यामुळे मागील काही दिवसांपासून राज्य सरकारच्या मालकीच्या भातसा आणि अप्पर वैतरणा धरणांतून राखीव साठ्याचे पाणी पालिकेला घ्यावे लागते आहे. पालिकेच्या पाच धरणांमध्ये असलेला पाणीसाठा हा जुलैपर्यंतच पुरणारा आहे. या पार्श्वभूमीवर पालिकेने राज्य सरकारकडे भातसा आणि अप्पर वैतरणा तलावातील राखीव पाणीसाठा वापरण्याची परवानगी मागितली होती. ती सरकारकडून देण्यात आली आहे. भातसामधून २ हजार दशलक्ष लिटर आणि अप्पर वैतरणातून ५०० दशलक्ष लिटर पाणी पालिका दररोज उचलत आहे. म्हणजे मुंबईला दररोज पाणीपुरवठा केल्या जाणाऱ्या ३५०० दशलक्ष लिटर पाण्यापैकी सुमारे ७० टक्के पाणी सध्या भातसा आणि अप्पर वैतरणातून घ्यावे लागते आहे.
तलावक्षेत्रात पावसाचे आगमन