मुंबई- सोमवारी लोकसभा निवडणुकीच्या चौथ्या टप्प्यातील मतदान प्रक्रिया पार पडणार आहे. मात्र, असे असताना मुंबईतील चाकरमानी मात्र मतदानाच्या दिवशी सुट्टी असल्याने कोकणाकडे रवाना होत आहेत. या निवडणुकीत कामगारांना मतदान करता यावे, यासाठी भरपगारी सुट्टी देण्याचे निर्देश निवडणूक विभागाने दिले आहेत. मात्र, मुंबईतील मराठी मतदार मतदानाकडे पाठ फिरवून आप-आपल्या गावी निघाल्याचे चित्र आहे.
परळ, दादर परिसरात मोठ्या प्रमाणात कोकणवासीय राहतात. या परिसरातील नागरिक कोकणला जाण्यासाठी खासगी बसने निघाले आहेत. याबाबत काही मतदारांशी बोलण्याचा प्रयत्न 'ईटीव्ही भारत'च्या प्रतिनिधीने केला, त्यावेळी कोणी लग्न कार्यासाठी गावी चालल्याचे सांगतिले. तर कोणी न्यायालयीन कामकाजासाठी गावी जावे लागत असल्याचे सांगितले.
चौथ्या टप्प्याच्या निवडणुकीत जास्तीत-जास्त मतदान व्हावे, यासाठी निवडणूक विभागाने पुढाकार घेतला होता. मतदार जनजागृतीवर निवडणूक विभागाने भर दिला होता. मात्र, मतदानाबाबत मुंबईतील मतदार फारसे उत्साही नसल्याचे यावरुन दिसून येत आहे.