कोव्हिशिल्ड लसीचा दुष्परिणाम नाही, केईएम रुग्णालयात दुसऱ्या टप्प्यातील चाचणी सुरू

ऑक्सफर्ड विद्यापीठ आणि पुण्याच्या सिरम इन्स्टिट्यूटने बनवलेल्या कोरोना विरोधातील "कोव्हिशिल्ड" लसीची चाचणी मुंबईत केईम आणि नायर रुग्णालयात केली जात आहे. या लसीचा अद्याप दुष्परिणाम दिसून आला नसल्याने आजपासून लसीची दुसऱ्या टप्प्यातील चाचणी सुरू करण्यात आली आहे.

मुंबई - कोरोनाचा प्रसार रोखण्यासाठी मुंबई महापालिकेच्या आरोग्य विभागाकडून प्रयत्न सुरू आहेत. याचाच एक भाग म्हणून ऑक्सफर्ड विद्यापीठ आणि पुण्याच्या सिरम इन्स्टिट्यूटने बनवलेल्या कोरोना विरोधातील "कोव्हिशिल्ड" लसीची चाचणी मुंबईत केईम आणि नायर रुग्णालयात केली जात आहे. या लसीचा अद्याप दुष्परिणाम दिसून आला नसल्याने आजपासून लसीची दुसऱ्या टप्प्यातील चाचणी सुरू करण्यात आल्याची माहिती रुग्णालयाचे प्रमुख डॉ. हेमंत देशमुख यांनी दिली.

मुंबईत मार्चपासून कोरोनाचा प्रादुर्भाव आहे. कोरोनाचा प्रसार रोखण्यासाठी आयसीएमआरच्या मान्यतेने मुंबई महापालिकेच्या आरोग्य विभागाने केईएम आणि नायर रुग्णालयात ऑक्सफर्ड विद्यापीठ आणि पुण्याच्या सिरम इन्स्टिट्यूटने बनवलेल्या कोरोना विरोधातील "कोव्हिशिल्ड" लसीची चाचणी करण्यास सुरुवात करण्यात आली. 26 सप्टेंबरपासून किंग एडवर्ड मेमोरियल (केईएम) रुग्णालयात लसीच्या चाचणीला सुरुवात झाली. चाचण्यांच्या पहिल्याच दिवशी 20 ते 45 वयोगटातील तीन स्वयंसेवकांना इंट्रामस्क्युलर डोस दिला गेला. त्यानंतर, 28 सप्टेंबर या दिवशी नायरमध्ये देखील 3 स्वयंसेवकांना कोव्हिशिल्डची लस देण्यात आली.

100 स्वयंसेवकांना कोव्हिशील्डचा दुसरा डोस दिला जाणार -

कोव्हिशिल्ड लसीच्या मानवी चाचणीला वेग आला असून गेल्या 22 दिवसांत दोन्ही रुग्णालयांमध्ये 160हून अधिक स्वयंसेवकांना कोव्हिशील्ड लसीचा डोस देण्यात आला आहे. केईएम रुग्णालयात आतापर्यंत 100 जणांना तर, नायरमध्ये 60 हून अधिक स्वयंसेवकांना कोव्हिशिल्डचा डोस देण्यात आला आहे. केईएम रुग्णालयातील 100 स्वयंसेवकांना कोव्हिशिल्डचा दुसरा डोस आजपासून दिला जात आहे. केईएममध्ये ज्या स्वयंसेवकांना कोविशिल्डचा डोस देण्यात आला, त्यांचा 28 दिवसांचा कालावधी आता पूर्ण झाला आहे. त्यामुळे, आजपासून (सोमवार) त्यांना दुसरा डोस देण्यात येणार आहे. आतापर्यंत 100 जणांना डोस देण्यात आला आहे. आता आजपासून दुसरा डोस दिला जाणार आहे, केईएम रूग्णालयाचे प्रमुख डॉ. हेमंत देशमुख यांनी सांगितले.