मुंबई - साकीनाका- खैराणी रोड येथील आशापुरा कंपाउंडला काल(शुक्रवारी) सायंकाळी भीषण आग लागली होती. या आगीमध्ये दोघांचा मृत्यू झाला आहे. आगीत ३० ते ३५ गाळे जळून खाक झाले आहेत. आगीवर नियंत्रण मिळवल्यावर शोध मोहीम सुरू असताना दोन जणांचे मृतदेह मिळाले आहेत.
साकीनाका परिसरात लागलेल्या आगीत २ जणांचा मृत्यू
आरती लालजी जैस्वाल(२५) पियूष धीरज काताडीया (४२) अशी आगीत सापडून मृत्यूमुखी पडलेल्यांची नावे आहेत. मृतदेह राजावाडी रुग्णालयात पाठवण्यात आल्याची माहिती अग्निशमन दलाकडून देण्यात आली आहे. काल सायंकाळी ५:२० वाजताच्या सुमारास खैरानी रोड, साकीनाका, कुर्ला (पश्चिम) येथे कारखान्यांमधील इलेक्ट्रिक वस्तूंना आग लागली होती. ही आग सायंकाळी ५:३९ वाजता लेवल ३ ची असल्याचे मुंबई अग्निशमन दलाकडून घोषित करण्यात आले होते.