साध्वीचे आरोप तथ्यहीन; तुरुगांत लैगिंक, मानसिक छळ झालाच नाही

साध्वी प्रज्ञा सिंग हिला २००८ साली मालेगाव बॉम्ब ब्लास्टप्रकरणी अटक करण्यात आली. २००८ ते २०१७ अशी तब्बल ९ वर्षे साध्वी कारागृहात होती. या दरम्यान, चौकशीत पुरुष पोलिसांकडून तिचा मानसिक, शारीरिक छळ करण्यात आला, असा आरोप साध्वीने केला.

मुंबई- भोपाळ लोकसभा मतदार संघाची भाजप उमेदवार साध्वी प्रज्ञा सिंग हिने हुतात्मा हेमंत करकरे यांच्या संदर्भात वादग्रस्त टिपणी केली. त्यामुळे तिच्यावर सर्व स्तरातून टीकेची झोड उठली. त्यानंतर तिने पोलीस कस्टडीत असताना लैंगिक व मानसिक छळ झाल्याचा आरोप केला होता. मात्र, साध्वीने केलेले आरोप मुंबई उच्च न्यायालयासह सर्वोच्य न्यायालयात सिद्ध होऊ शकले नाहीत. याबरोबर राष्ट्रीय मानवाधिकार आयोगाच्या चौकशी समिती अहवालात साध्वीने केलेल्या आरोपात तथ्य नसल्याचे समोर आले आहे.

साध्वी प्रज्ञा सिंग हिला २००८ साली मालेगाव बॉम्ब ब्लास्टप्रकरणी अटक करण्यात आली. २००८ ते २०१७ अशी तब्बल ९ वर्षे साध्वी कारागृहात होती. या दरम्यान, चौकशीत पुरुष पोलिसांकडून तिचा मानसिक, शारीरिक छळ करण्यात आला, असा आरोप साध्वीने केला. मात्र, साध्वीच्या या आरोपानंतर पोलीस रिमांडसाठी तिला न्यायालयात हजर केले असता तिने न्यायालयाला याची तक्रार केली नाही. पोलीस चौकशी दरम्यान तिच्या वैद्यकीय चाचणीतही मारहाण, लैंगिक किंवा शारीरिक छळ झाल्याची कोणतीही बाब समोर आलेली नव्हती.

मानवधिकार आयोगाचा अहवालात काय आहे -
शिवसेना हिंदुस्थान या संघटनेचे प्रमुख पवनकुमार गुप्ता यांनी यासंदर्भात तक्रार दाखल करत साध्वीवर अमानुष अत्याचार पोलीस चौकशीत होत असल्याची तक्रार दाखल केली. त्यानंतर २०१४ मध्ये केंद्रीय मानवाधिकार आयोगाने यासंदर्भात चौकशी समितीची नेमणूक केली होती. त्यानुसार डीआयजी आर.एस. खैरे यांच्या अध्यक्षतेखाली वरिष्ठ अधिकाऱ्यांच्या समितीने आपला अहवाल सादर केला होता.

यामध्ये साध्वीचे कोणताही छळ झाला नसल्याचे सांगितले आहे. ज्यात तुरुंग प्रशासन, तुरुंगातील साध्वी सोबतचे इतर कैदी आणि साध्वीला उपचारासाठी दाखल करण्यात आलेल्या रुग्णालयातील चौकशी आणि उपलब्ध माहितीच्या आधारावर हा अहवाल तयार करण्यात आला होता. याचा परिणाम म्हणून शेवटी २०१५ ला मानवाधिकार आयोगाने याप्रकरणी राज्याच्या दहशतवाद विरोधी पथकाला क्लीन चीट दिलेली आहे.