मुंबई - लोकशाहीत विरोधकांना सरकारवर टीका करण्याचा अधिकार आहे, मात्र सत्तेमुळे बेफाम झालेल्या कार्यकर्त्यांकडून सरकारविरोधात टीका केल्यास, त्याविरोधात अत्यंत हीन पातळीवर येऊन कार्यकर्त्यांकडून अर्वाच्च शिविगाळ आणि जीवे मारण्याच्या धमक्या दिल्या जात आहेत. सत्तेमुळे बेफाम झालेल्या कार्यकर्त्यांवर कठोर कारवाई करावी, अशी मागणी काँग्रेस पक्षाचे प्रवक्ते सचिन सावंत यांनी आज मुख्यमंत्री देवेंद्र फडणवीस यांना एका पत्राद्वारे केली आहे.
सावंत यांचे मुख्यमंत्र्यांना पत्र
अभिनेत्री केतकी चितळे यांना समाजमाध्यमांमध्ये त्यांनी व्यक्त केलेल्या मताबद्दल अत्यंत हीन पातळीची भाषा वापरून शिवीगाळ करण्यात आली होती. त्यामुळे राज्याच्या जनमानसात याविरोधात तीव्र प्रतिक्रिया उमटल्या होत्या. या प्रकाराचा जितक्या तीव्र शब्दात निषेध करावा तितका कमीच आहे. परंतु राज्यभरात अशा तऱ्हेच्या अनेक घटना रोज घडत आहेत. दुर्दैवाने भाजपचे समर्थक यात अग्रेसर असल्याचे सातत्याने दिसत आहेत.