'सायन मृतदेह अदलाबदल प्रकरणी डॉक्टर, पोलिसांची चौकशी समिती नेमा'

सायन रुग्णालयात मृतदेहाच्या अदलाबदलीप्रकरणी विधान परिषदेचे विरोधी पक्षनेते प्रवीण दरेकर यांच्या उपस्थितीत रुग्णालयाबाहेर आंदोलन करण्यात आले. त्यानंतर रुग्णाच्या कुटुंबीयांना सोबत घेऊन दरेकर यांनी पालिका आयुक्तांची भेट घेतली. तसेच मृत रुग्णाच्या कुटुंबीयांना नुकसानभरपाई देण्याची तसेच मृतदेह अदलाबदली प्रकरणी चौकशी समिती नेमण्याची मागणी केली.

मुंबई :मुंबई महापालिकेच्या सायन रुग्णालयातील मृतदेह अदलाबदल प्रकरणी तज्ज्ञ डॉक्टर आणि पोलीस अधिकाऱ्यांची चौकशी समिती नियुक्त करण्याची मागणी भाजपातर्फे पालिका आयुक्तांकडेकरण्यात आली आहे. पालिका आयुक्तांनीही समिती नेमण्याचे आश्वासन दिले आहे. तसेच मृत अंकुश सुरवडे याच्या कुटुंबीयांना नुकसानभरपाई देण्याची मागणी भाजपाकडून करण्यात आल्याची माहिती विधान परिषदेचे विरोधी पक्षनेते प्रवीण दरेकर यांनी दिली. सायन रुग्णालयातील मृतदेह अदलाबदल प्रकरणी प्रवीण दरेकर यांनी पालिका आयुक्त इक्बाल सिंग चहल आज (बुधवार) भेट घेतली. या भेटीनंतर दरेकर यांनी ही माहिती दिली आहे.

अंकुश सुरवडे (२६) या तरुणाचा मृतदेह पालिकेच्या सायन रुग्णालयात अदलाबदली झाला होता. या प्रकरणी रुग्णालयातील कर्मचाऱ्याना निलंबित करण्यात आले असून चौकशी केली जात आहे. या प्रकरणी भाजपने विधान परिषदेचे विरोधी पक्षनेते प्रवीण दरेकर यांच्या उपस्थितीत रुग्णालयाबाहेर आंदोलन केले आहे. दरेकर यांनी दोषींवर कारवाईची मागणी केली आहे. त्यानंतर आज अंकुश सुरवडे याच्या कुटुंबीयांना सोबत घेऊन दरेकर यांनी पालिका आयुक्तांची भेट घेतली. यावेळी आमदार मंगलप्रभात लोढा, तामिळ सेलव्हन, पालिकेतील भाजपचे गटनेते प्रभाकर शिंदे आदी उपस्थित होते. यावेळी अंकुशच्या कुटुंबीयांना नुकसानभरपाई देण्याची, मृतदेह अदलाबदली प्रकरणी चौकशी समिती नेमण्याची मागणी केली. सायन रुग्णालयातील शवविच्छेदन विभागात एकच डॉक्टर गेले 10 वर्ष एकाच पदावर कार्यरत आहे. अंकुशच्या डोक्याला मार लागला असताना त्याच्या कमरेजवळ ऑपरेशन केल्याचे दिसत आहेत. सायन रुग्णालयाचा पुनर्विकास गेले कित्येक वर्ष थांबला असल्याचे या भेटीदरम्यान पालिका आयुक्तांच्या निदर्शनास आणून दिले. पालिका आयुक्तांनी त्यावर योग्य ती कार्यवाही करण्याचे आश्वासन दिल्याची माहिती दरेकर यांनी दिली.

नेमके काय आहे प्रकरण -

अंकुश सुरवडे हे अपघातात जखमी झाल्याने २८ ऑगस्टला सायन रुग्णालयात उपचारार्थ दाखल करण्यात आले होते. एका अपघातात गंभीर जखमी झाल्याने उपचारार्थ आलेल्या अंकुशवर शस्त्रक्रियाही पार पाडली होती. परंतु १३ सप्टेंबरला अंकुशचा मृत्यू झाला. हेमंत दिगंबर याला १२ सप्टेंबरला मृतावस्थेतच त्यांच्या नातेवाईकांनी आणले होते. अंकुश व हेमंत या दोन्ही रुग्णांच्या मृतदेहांचे शवविच्छेदन रविवारी सकाळी करण्यात आले. त्यानंतर दोन्ही मृतदेह रुग्णालयाच्या शवागारात ठेवण्यात आले होते.

अंकुशच्या नातेवाईकांनी सायंकाळी ४ वाजता आम्ही मृतदेह ताब्यात घेतो, असे सांगितले व ते तेथून निघून गेले. त्याचवेळी हेमंतचे नातेवाईक त्या ठिकाणी आले असता त्यांना अंकुशचा मृतदेह देण्यात आला. पोलिसांची प्रक्रिया पार पाडल्यावर हेमंतच्या नातेवाईकांनी अंकुशचा मृतदेह हेमंतचा असल्याचे समजून त्यावर अंत्यविधीही केला. त्यानंतर, अंकुशचे नातेवाईक रुग्णालयात आले व त्यांनी मृतदेह ताब्यात देण्याची विनंती केल्यानंतर ही चूक घडल्याचे लक्षात आले. या प्रकरणी शवागृहातील दोन कर्मचाऱ्यांना निलंबित करण्यात आले आहे.

हेही वाचा -राज्यात स्व. बाळासाहेब ठाकरे अपघात विमा योजना होणार लागू, राज्य सरकारचा निर्णय