मुंबई -वांद्रे येथील क्रिकेट क्लबमध्ये महाराष्ट्र नवनिर्माण सेनेची राज्यव्यापी बैठक सुरू आहे. आगामी महानगरपालिका निवडणुकीची रणनीती आखण्यासाठी मनसेने ही बैठक बोलावली असून त्यात इतरही विविध मुद्द्यांवर चर्चा होणार आहे. मनसेचे पदाधिकारी या बैठकीला उपस्थित आहेत.
मिताली ठाकरेही उपस्थित -
आजच्या या बैठकीला राज ठाकरे यांच्या सुनबाई आणि अमित ठाकरे यांच्या पत्नी मिताली या देखील उपस्थित आहेत. आज मिताली अधिकृतपणे मनसेच्या सदस्य होणार असल्याची माहिती समोर येत आहे. आगामी महापालिका निवडणुका आणि पक्ष वाढीसाठी नवनवीन संकल्पना यांवर चर्चा होणार आहे. मनसे नेते बाळा नांदगावकर, अविनाश अभयंकर, गजानन काळे यांच्यासह पक्षातील विविध नेते उपस्थित आहेत.
वीजबिलाच्या प्रश्नावर चर्चा होण्याची शक्यता -
लॉकडाऊन काळातील वाढीव वीज बिलाबाबत सवलत न देता यू-टर्न घेणारे ऊर्जामंत्री नितीन राऊत आणि राज्य सरकारच्या विरोधात फसवणुकीचे गुन्हे दाखल करा, असे आदेश मनसे प्रमुख राज ठाकरे यांनी पक्षातील पदाधिकाऱ्यांना दिले आहेत. त्यानुसार उल्हासनगर शहरात मनसे कार्यकर्त्यांनी ऊर्जा मंत्री नितीन राऊत आणि राज्य सरकारच्या विरोधात फसवणुकीचा गुन्हा दाखल करण्यासाठी उल्हासनगरचे सहाय्यक पोलीस उपायुक्त धुळा टेळे यांच्याकडे तक्रार दाखल केली आहे. या पार्श्वभूमीवर आजच्या बैठकीमध्ये या प्रश्नावर चर्चा होण्याची शक्यता आहे.