मुंबई :आगामी विधानसभा निवडणुका तोंडावर येवून ठेपल्या आहेत. सर्वच राजकीय पक्ष या निवडणुकीच्या पार्श्वभूमीवर तयारीला लागले आहेत. या निवडणुकीत सर्वांचेच लक्ष कोकणातील खेड दापोली विधानसभा मतदारसंघाकडे लागले आहे. काही दिवसांपूर्वीच उद्धव ठाकरे यांची खेडमध्ये सभा झाली. त्यानंतर लगेचच मुख्यमंत्री एकनाथ शिंदे यांची देखील खेडमध्ये सभा झाली. इथे दोन्ही गटांनी आपापला उमेदवार जाहीर केला. मात्र, या मतदारसंघात 60 टक्के मतदान असलेला कुणबी समाज मात्र नाराज आहे. कुणबी समाजाने त्यांच्या समाजाचा उमेदवाराची मागणी केली आहे. या संदर्भात आज मुंबई येथे एक मेळावा घेण्यात आला.
40 वर्षांचा कुणबी समाजाचा वनवास :या संदर्भात माध्यमांशी बोलताना कुणबी समाजाचे नेते आणि कुणबी समाजाचे संभाव्य उमेदवार संदीप राजपुरे म्हणाले की, कोकणात जवळपास 60 ते 65 टक्के मतदार हा कुणबी समाजाचा आहे. मात्र, मागची 40 ते 45 वर्ष या समाजाला त्यांचे नेतृत्व करणारा उमेदवार मिळालेला नाही. कोणत्याही पक्षाने विधानसभा निवडणुकीसाठी कुणबी समाजातील नेत्याला उमेदवारी दिलेली नाही. हा राग आमच्या कुणबी समाजामध्ये आहे. ही 40 वर्षाची खदखद आता कुठेतरी बाहेर पडत आहे. आजच्या मेळाव्यात आमचा हाच ठराव झाला आहे की, 40 वर्षाचा वनवास आता आपण संपवायचा आहे.