मुंबई- राज्य सरकार नियमांची पायमल्ली करून बिल्डरांचा फायदा करत आहे. महसूलमंत्र्यांच्या सहमतीने हवेली तालुक्यातील म्हातोबा ट्रस्टची ८४ कोटी रुपयांची इनाम जमीन विकली गेली. यात ४२ कोटी रुपयांचा महसूल बुडाला असून या भ्रष्टाचाराची चौकशी व्हायला हवी. खडसेंवर जशी कारवाई केली, तशी कारवाई महसूलमंत्र्यांवरही करावी, अशी मागणी राष्ट्रवादीचे गटनेते जयंत पाटील यांनी बुधवारी विधानसभेत केली.
विरोधकांनी केली राजीनाम्याची मागणी
जयंत पाटील यांनी महसूलमंत्री चंद्रकांत पाटील यांच्यावर थेट आरोप करत केसनंद येथील म्हातोबा देवस्थान जमीन प्रकरण मांडले. यामध्ये ४२ कोटी रुपयांचा शासनाचा महसूल बुडाला आहे. सर्व कायद्याचे उल्लंघन होत आहे. ५० टक्के नजराणा न भरता ही जमीन विक्री झाली. ही सर्व जमीन २३ एकर आहे. याची किंमत २५० ते ३०० कोटींच्या घरात आहे.