विक्रोळीत धोकादायक इमारती; हजारो रहिवाशांचे जीव धोक्यात

म्हाडाच्या संक्रमण शिबिरातील धोकादायक इमारतींचा प्रश्न पुन्हा एकदा ऐरणीवर आला आहे. सोमवारी रात्री सव्वा अकराच्या सुमारास इमारत क्रमांक १८६ च्या गॅलरीचा भाग कोसळला.

मुंबई- शहरातील जुन्या धोकादायक इमारतींचा प्रश्न पावसाळ्यात आणखीनच गंभीर झाला आहे. विक्रोळी येथील कन्नमवार नगरमध्ये म्हाडा वसाहतीतील जुनाट इमारती कधीही कोसळतील, अशी त्यांची अवस्था झाली आहे. त्यामुळे येथील रहिवासी जीव मुठीत घेऊन वास्तव्य करत आहेत. सोमवारी रात्री ११ वाजण्याच्या सुमारास एका इमारतीचा काही भाग कोसळल्याने नागरिकांमध्ये भीतीचे वातावरण पसरले आहे.

म्हाडाच्या संक्रमण शिबिरातील धोकादायक इमारतींचा प्रश्न पुन्हा एकदा ऐरणीवर आला आहे. सोमवारी रात्री सव्वा अकराच्या सुमारास इमारत क्रमांक १८६ चा गॅलरीचा भाग कोसळला. या घटनेत कोणतीही जीवित हानी झाली नसली तरी भीतीचे वातावरण पसरले आहे. या घटनेची माहिती मिळताच अग्निशमन दल तसेच स्थानिक पोलिसांनी धाव घेत ही इमारत खाली केली. ही इमारत ३५ ते ४० वर्षे जुनी आहे.

कन्नमवारनगरमध्ये संक्रमण शिबिराच्या अनेक इमारती धोकादायक अवस्थेत आहेत. काही दिवसांपूर्वी घरातील टाकी अंगावर पडून एका महिलेचा मृत्यू झाला होता. त्यातच ही घटना घडल्यामुळे नागरिक भयभीत झाले आहेत. यावेळी म्हाडा विरोधात संताप व्यक्त करण्यात आला. संक्रमण शिबिरातील सर्वच इमारतींची स्थिती गंभीर आहे. अनेक इमारती मोडकळीस आल्या आहेत. लोक जीव धोक्यात घालून राहत आहेत. घरांमध्ये सिलिंग पडण्याच्या दुर्घटना घडत आहेत.

विक्रोळी सोडून आम्ही दुसरीकडे जाणार नाही. आमची राहण्याची व्यवस्था इथेच करावी, अशी रहिवाशांची मागणी आहे. या इमारतीत ३२ कुटुंब वास्तव्यास होते. ऐन रात्री ही इमारत खाली केल्यामुळे या इमारतीच्या रहिवाशांवर रस्त्यावर झोपण्याची वेळ आली आहे.