मुंबई : औद्योगिक वसाहती, वाहनांची वाढती संख्या यासह विविध कारणांमुळे मुंबईतील प्रदूषणाचे प्रमाण वाढत आहे. या प्रदूषणावर नियंत्रण मिळवण्यासाठी राज्य सरकार आणि पालिका कोट्यवधी रुपये खर्च करत आहे, परंतु तरीही गोवंडीत वायुप्रदूषणामुळे क्षय, दमा यांसारख्या विविध आजारांनी नागरिक ग्रस्त आहेत. इतकेच नव्हे, तर आता वायु प्रदूषणाचा परिणाम प्राण्यांवर आणि पक्ष्यांवर दिसून येत आहे. त्यामुळे गेल्या दोन महिन्यांत अचानक ५० कोंबड्यांचा मृत्यू झाल्याचा दावा इथल्या नागरिकांनी केला आहे.
बकऱ्या कोंबड्यांच्या मृत्यूने लाखोंचे नुकसान :या संदर्भात बोलताना इथले कोंबड्यांचे व्यवसायिक इस्तियाक अहमद शेख अब्बासी म्हणाले की, सुरुवातीला माझा बकऱ्यांचा व्यवसाय होता. मात्र, माझ्या बकऱ्यांच्या हळूहळू मृत्यू होऊ लागला. मग मी कोंबड्यांचा व्यवसाय सुरू केला. सुरुवातीचे काही दिवस ठीक गेले. मात्र, नंतर कधी सहा, कधी चार, कधी तीन असा कोंबड्यांचा मृत्यू होऊ लागला. असा माझ्या तब्बल 50 हून अधिक कोंबड्यांचा मृत्यू झाला आहे. आमच्या दुकानासमोरच आम्ही काही झाडे लावली आहेत. आम्ही ही झाड रोज साफ करतो. म्हणजे या झाडांवर पाणी मारतो, त्यांच्या पानांवर जी काही धूळ बसलेली असते ती आम्ही साफ करतो. त्यावेळी आमच्या लक्षात आले इथल्या हवेत धुळीचे प्रदूषण जास्त आहे. या प्रदूषणामुळेच या प्राण्यांचा पक्षांचा मृत्यू होत आहे. यात माझे काही लाखांचे नुकसान झाले आहे.
प्रदूषणाने गोवंडीत सर्वाधिक मृत्यू :देवनार डम्पिंग ग्राउंड, एसएमएस कंपनी आणि सिमेंट मिक्सर प्रकल्प यामुळे दिवसेंदिवस गोवंडी परिसरात प्रदूषणाचा धोका वाढत आहे. या प्रकल्पांचा परिणाम इथल्या राहिवाशांवर झाला आहे. या परिसरात वास्तव्यास असलेल्या अनेकांना श्वसनाच्या आजाराने ग्रासले आहे. गेल्या पाच वर्षांमध्ये श्वसनाच्या आजाराने मृत्यू झालेल्यांपैकी सर्वाधिक लोक हे फक्त गोवंडीमधील आहेत. गेल्या अनेक वर्षांपासून देवनार डम्पिंग ग्राउंडमधून पसरणारी दुर्गंधी, प्रदूषण आणि त्यामुळे निर्माण होणाऱ्या आजारांनी इथल्या स्थानिक राहिवाशांना ग्रासले आहे. त्यातच २००९ मध्ये याच परिसरात रुग्णालयातील जैववैद्यकीय कचर्‍याची विल्हेवाट लावण्यासाठी मुंबई महानगरपालिकेने प्रकल्प उभारला.
मेडिकल वेस्ट कंपनी हद्दपार करा :मुंबई महानगरपालिकेने उभारलेला हा मेडिकल वेस्ट म्हणजेच जैववैद्यकीय कचऱ्याची विल्हेवाट लावणारा प्रकल्प एसएमएस कंपनीमार्फत चालविण्यात येत आहे. या कंपनीत मुंबई शहर आणि उपनगरातील सर्व रुग्णालयांमधील जैववैद्यकीय कचर्‍याची विल्हेवाट लावण्यात येते. या कंपनीमधून मोठ्या प्रमाणात विषारी धूर हवेत सोडला जात असल्याचा आरोप देखील इथल्या स्थानिक रहिवाशांनी केला आहे. दरम्यान, याचा परिणाम थेट येथील नागरिकांच्या आरोग्यावर होत आहे. त्यामुळे ही कंपनी या परिसरातून हद्दपार करावी अशी मागणी स्थानिक रहिवाशांकडून वारंवार करण्यात येत आहे.