कोरोना लसीकरणात आता खासगी रुग्णालयाचाही सहभाग

16 जानेवारीपासून देशभरात लसीकरणास सुरुवात झाली आहे. मुंबईत 9 लसीकरण केंद्राच्या माध्यमातून पहिल्या टप्प्यातील लसीकरणाला मुंबईत सुरुवात झाली. आयसीएमआरच्या निर्देशानुसार पहिल्या टप्प्यात कोरोना योद्धे अर्थात डॉक्टर-नर्स-आरोग्य कर्मचारी यांना लस देण्यात येत आहे.

मुंबई - राज्यात नुकतीच लसीकरणाच्या दुसऱ्या टप्प्याला सुरुवात झाली आहे. कोरोना योध्यासह आता फ्रंटलाइन योध्यांना ही लस टोचवली जात आहे. तर मुंबईत आता लवकरच तिसऱ्या टप्प्याला सुरुवात करण्यासाठी मुंबई महानगर पालिका तयारीला लागली आहे. या तिसऱ्या टप्प्यात ज्येष्ठ नागरिकांना अर्थात 50 वर्षांवरील नागरिकांना लस दिली जाणार आहे. तर या गटातील नागरिकांचा आकडा मोठा असल्याने लसीकरण केंद्र वाढवण्यासाठी आता पालिका लसीकरण मोहिमेत खासगी रुग्णालयाना सहभागी करून घेणार आहेत. रुग्णालयाची निवड करण्याच्या प्रक्रियेला सुरुवात झाली असून लवकरच रुग्णालयाची नावे जाहीर केली जातील, अशी माहिती सुरेश काकाणी, अतिरिक्त आयुक्त, पालिका यांनी दिली आहे.

आतापर्यंत 75 हजारांहून अधिक योध्यांना लस -

16 जानेवारीपासून देशभरात लसीकरणास सुरुवात झाली आहे. मुंबईत 9 लसीकरण केंद्राच्या माध्यमातून पहिल्या टप्प्यातील लसीकरणाला मुंबईत सुरुवात झाली. आयसीएमआरच्या निर्देशानुसार पहिल्या टप्प्यात कोरोना योद्धे अर्थात डॉक्टर-नर्स-आरोग्य कर्मचारी यांना लस देण्यात येत आहे. तर नुकतेच दुसऱ्या टप्प्यातील लसीकरण सुरू झाले आहेत. यात फ्रंटलाइन योद्धे अर्थात पोलीस, सफाई कामगार आणि पालिका कामगारांना लस दिली जात आहे. त्यानुसार आतापर्यंत म्हणजेच शनिवारपर्यंत 75 हजारांहून अधिक जणांचे लसीकरण पूर्ण झाले आहे. पहिल्या टप्प्यात 1 लाख 30 हजार तर दुसऱ्या टप्प्यात 1 लाख 80 हजार योध्याच्या लसीकरणाचे उद्दिष्ट आहे, अशात आता तिसऱ्या टप्प्याला सुरुवात करण्याची तयारी सुरू झाली आहे.

हेही वाचा -प्रेयसीला जिवंत जाळण्यासाठी गेलेल्या प्रियकराचाच आगीत भाजून मृत्यू

15 मार्चपासून तिसरा टप्पा?

तिसऱ्या टप्प्यात 50 वर्षावरील नागरिकांना लस दिली जाणार आहे. तर कोरोना नियंत्रणात आणण्यासाठी हा टप्पा महत्त्वाचा ठरणार आहे. कारण मुंबईत 50 वर्षावरील नागरिक कोरोनाचे सर्वाधिक शिकार ठरले आहेत. तर मृत्यू ही याच गटातील रुग्णांचा सर्वाधिक आहे. अशावेळी या गटाचे लसीकरण झाल्यास कोरोना नियंत्रणात येण्यास मदत होईल असे म्हटले जात आहे. तर दुसरीकडे या गटातील नागरिकाचा आकडा मोठा असणार आहे. तर ज्येष्ठ नागरिकांना घराजवळ लस उपलब्ध करून देणेही गरजेचे असणार आहे. त्यामुळे तिसऱ्या टप्प्यात लसीकरण केंद्र वाढवणे आणि सर्व परिसरात केंद्र उपलब्ध करून देणे पालिकेसाठी आवश्यक असणार आहे. त्यामुळेच तिसऱ्या टप्प्यात खासगी रुग्णालयाना सहभागी करून घेतले जाणार असल्याचे काकाणी यांनी सांगितले आहे.

अनेक बडी रुग्णालये उत्सुक -

खासगी रुग्णालयांना लसीकरण मोहिमेत सहभागी करून घेण्यासाठी पालिकेने खासगी रुग्णालयाकडे अर्ज मागविले होते. त्यानुसार या आठवड्यापर्यंत अंदाजे 100 रुग्णालयाकडून अर्ज दाखल झाले आहेत. यातील 13 रुग्णालयांची नावे निवडली असून अंतिम नावे लवकरच जाहीर केली जाण्याची शक्यता आहे. तर यात आणखी काही रुग्णालयाची भर ही पडण्याची शक्यता आहे. पण आता खासगी रुग्णालये लसीकरणात सहभागी झाल्यास लसीकरणाला वेग येईल, असे म्हटले जात आहे.