Nana Patole Criticized NCP : काँग्रेस-राष्ट्रवादीमध्ये पुन्हा धुसफूस, विधानपरिषद निवडणुकीत राष्ट्रवादीने आघाडीचा धर्म पाळला नाही - नाना पटोले

राष्ट्रवादी काँग्रेसने नुकताच झालेल्या विधान परिषदेच्या नाशिक पदवीधर मतदारसंघात आघाडीचा धर्म पाळला नाही. त्यामुळे यापुढे आमच्याकडून त्यांनी आघाडीचा धर्म पाळण्याची अपेक्षा करू नये, असा इशारा आज (शुक्रवारी) काँग्रेस प्रदेशाध्यक्ष नाना पटोले यांनी दिला आहे.

मुंबई :नाशिक पदवीधर मतदार संघामध्ये झालेल्या नुकत्याच नाराजी नाट्यामध्ये काँग्रेसने सत्यजित यांना तिकीट द्यायला हवे होते, असे मत विरोधी पक्ष नेते अजित पवार यांनी व्यक्त केले आहे. आघाडीच्या वतीने सत्यजित यांनी निवडणूक लढवली असती तर चित्र आणखीन चांगले झाले असते, असे मत विरोधी पक्ष नेते पवार यांनी व्यक्त केले आहे.

पवारांचा खर्गेना फोन :सत्यजित तांबे यांना तिकीट मिळावे, यासाठी सर्वजण प्रयत्न करीत होते. महाविकास आघाडीचा नाशिक पदवीधर मतदारसंघातील उमेदवार म्हणून सत्यजित तांबे यांनाच उमेदवारी मिळावी यासाठी राष्ट्रवादी काँग्रेसचे अध्यक्ष शरद पवार यांनीही काँग्रेस अध्यक्ष मल्लिकार्जुन खरगे यांना फोन केला होता अशी माहिती अजित पवार यांनी दिली. मात्र, सत्यजित यांना थेट उमेदवारी न दिली गेल्याने आज अडचण झाली आहे. मात्र, काँग्रेसने पुन्हा एकदा त्यांना सामावून घ्यायला पाहिजे, असे मतही पवार यांनी व्यक्त केले होते. तसेच सत्यजित तांबे यांना राष्ट्रवादी काँग्रेसच्या कार्यकर्त्यांनी निवडणुकीत मदत केल्याचेही जाहीर वक्तव्य अजित पवार यांनी केले.

पवारांनी आघाडीचा धर्म पाळला नाही : विरोधी पक्षनेते अजित पवार यांच्या या वक्तव्यानंतर नाना पटोले यांनी नाराजी व्यक्त केली आहे. काँग्रेसने बंडखोर उमेदवार सत्यजित तांबे यांच्यावर कारवाई करत त्यांचे निलंबन केले होते. त्यांच्यावर पक्षाने कारवाई केल्यानंतर महाविकास आघाडी म्हणून शुभांगी पाटील यांच्या उमेदवारीला आपण पाठिंबा दिला होता. महाविकास आघाडीच्या वतीने उमेदवार म्हणून शुभांगी पाटील यांना सर्वांनी मदत करणे अपेक्षित होते. त्यांना सर्वांनी योग्य मदत केली असती तर त्या निवडून आल्या असत्या. मात्र अजित पवार यांच्या म्हणण्याप्रमाणे राष्ट्रवादी काँग्रेसने शुभांगी पाटील यांना मदत केली नाही. म्हणजेच त्यांनी आघाडीचा धर्म पाळलेला नाही. आघाडीचा विरोधातील उमेदवाराला मतदान करणाऱ्या राष्ट्रवादीने आता यापुढे आपल्याकडून आघाडीचा धर्म पाळण्याची अपेक्षा बाळगू नये, असा इशाराही यावेळी नाना पटोले यांनी दिला आहे.

पटोले भाजपवर गरजले :दुसऱ्यांचे घर फोडताना भाजपला आनंद होतो. मात्र जेव्हा त्यांचे घर फुटेल तेव्हा त्यांना दुःख कळेल, असे म्हणत काँग्रेस प्रदेशाध्यक्ष नाना पटोले यांनी भाजपवर टीकास्त्र सोडले. नाना पटोले नागपूरमध्ये बोलत होते. काँग्रेसकडून बंडखोर उमेदवार सत्यजित तांबे यांना पाठिंबा दिला जाणार नाही असे आज नाना पटोले यांनी 13 जानेवारी, 2023 रोजी स्पष्ट केले होते. भाजप भीती दाखवून घरे फोडण्याचे काम करत असल्याचा आरोप नाना पटोले यांनी नागपुरात केला होता.

पटोलेंनी व्यक्त केला खेद :विधानपरिषद पदवीधर नाशिक मतदारसंघात जानेवारीच्या दुसऱ्या आठवड्यात नाट्यमय घडामोडी घडल्यामुळे काँग्रेस पक्षाची गोची झाली होती. ऐनवेळी अधिकृत उमेदवाराने अर्ज दाखल न केल्यामुळे आता निवडणुकीच्या रिंगणार काँग्रेसचा उमेदवारच राहिलेला नाही. यासर्व घडामोडींची माहिती प्रदेशाध्यक्ष नाना पटोले यांनी हायकमांडला कळवली आहे. काँग्रेसकडून बंडखोर उमेदवार सत्यजित तांबेला पाठिंबा दिला जाणार नाही, असे आज नाना पटोले यांनी स्पष्ट केले आहे. डॉ. सुधीर तांबेनी पक्षासोबत फसवेगिरी केली आहे. भाजप भीती दाखवून घरे फोडण्याची काम करत असल्याचा आरोप नाना पटोले यांनी केला होता.

हायकमांडला माहिती दिली : नाशिकमध्ये जे झाले त्याची इत्यंभूत माहिती हायकमांडला दिली आहे. त्याचा आज निर्णय होईल. काँग्रेसने सत्यजित तांबेला समर्थन दिले नाही. डॉ. सुधीर तांबे कालपर्यंत बाळासाहेब थोरात यांच्या संपर्कात होते. या घटनाक्रमानंतर ते आमच्या संपर्कात नसल्याचे काँग्रेस प्रदेशाध्यक्ष नाना पटोले यांनी म्हटले होते. तांबे यांनी दगा फटका केला असल्याचे देखील नाना पटोले यांनी म्हटले होते.

हेही वाचा :Vidarbha State Demand : मुख्यमंत्री एकनाथ शिंदे यांच्या भाषणादरम्यान विदर्भवाद्यांचा गोंधळ; मराठी साहित्य संमेलनात घोषणाबाजी