मुंबई Railway Recruitment Scam: पश्चिम रेल्वेने दिलेल्या तक्रारीवरून रेल्वे भरती केंद्राकडून घेण्यात आलेल्या सामान्य विभागीय स्पर्धा परीक्षेच्या (जीडीसीई) प्रश्न आणि उत्तरपत्रिका फोडल्याच्या आरोपाखाली रेल्वेचे काही अधिकारी आणि मुंबईतील एका खाजगी कंपनीच्या अज्ञात अधिकार्‍यांसह अन्य संबंधितांविरोधात सीबीआयने गुन्हा दाखल केला आहे. जीडीसीईच्या कोट्यातून ३ जानेवारी २०२१ मध्ये रेल्वेमध्ये बिगर-तांत्रिक श्रेणी (नॉन ग्रॅज्युएट), कनिष्ठ लिपिक आणि टायपिस्ट तसेच प्रशिक्षित लिपिक या पदासाठी संगणक आधारित परीक्षा घेण्यात आली होती.
उत्तरांसह प्रश्नपत्रिका पुरवल्या :मुंबईसह अहमदाबाद, इंदूर, राजकोट, सुरत, वडोदरा अशा सहा शहरांमध्ये २८ परीक्षा केंद्रांवर घेण्यात आलेल्या परीक्षेत आठ हजार ६०३ उमेदवार सहभागी झाले होते, अशी माहिती सीबीआयकडून देण्यात आली आहे. जीडीसीईच्या परीक्षेला बसलेल्या काही उमेदवारांकडून पैसे घेऊन परीक्षा सुरू होण्यापूर्वी उत्तरांसह प्रश्नपत्रिका पुरवल्या गेल्या. काही उमेदवारांना व्हॉट्सअ‍ॅप मेसेजद्वारे तर काही उमेदवारांना मेळाव्याद्वारे प्रश्नपत्रिका प्रत्यक्ष दाखविण्यात आली होती. त्याचप्रमाणे परीक्षेच्या काही दिवसांनंतर उमेदवारांना व्हॉट्सॲप लिंकद्वारे परीक्षेचा निकाल देखील देण्यात आला होता. फर्मची परीक्षा संचालन संस्था म्हणून नियुक्ती करण्यात आलेल्या कंपनीच्या माध्यमातून हा सर्व प्रकार घडल्याचा आरोपही करण्यात आला आहे.