मुंबई- अभिनेता अक्षय कुमार यांनी त्यांचा १५ ऑगस्टला प्रदर्शित होणारा 'मिशन मंगल' हा चित्रपट डब करून मराठीत प्रदर्शित करण्याची घोषणा शुक्रवारी केली होती. मात्र, महाराष्ट्र नवनिर्माण चित्रपट सेनेचे अध्यक्ष अमेय खोपकर यांनी फेसबूक लाईव्हमधून त्याला विरोध करताच दोन तासात अक्षय कुमार यांनी माघार घेतल्याचे जाहीर केले. मिशन मंगल मराठीत डब करून प्रदर्शित होणार नसल्याचे त्यांनी स्पष्ट केले.
मराठी चित्रपटांना थिएटर्स मिळवण्यासाठी आतापर्यंत आंदोलन करत आलो. आता तुकडा पाडण्याची वेळ आली आहे. १५ आॅगस्टला अक्षय कुमार यांचा 'मिशन मंगल' हा सिनेमा जगामध्ये हिंदीत प्रदर्शित होत आहे. तो महाराष्ट्रात हिंदीसह मराठीतही प्रदर्शित होणार आहे. हिंदी भाषेतील 'मिशन मंगल'ला आमचा विरोध नाही, पण मराठीत डब करण्यामागे फार मोठं षडयंत्र आहे. इतर भाषेतील सिनेमे मराठीत डब करणार असाल, तर मराठी सिनेमांनी करायचं काय? असा प्रश्न अमेय खोपकर यांनी उपस्थित केला.