अभिनेत्री पायल घोषचा राजकारणात प्रवेश.. हाती घेतला आरपीआयचा झेंडा

आज अभिनेत्री पायल घोष यांनी आरपीआयमध्ये प्रवेश केला. चित्रपट दिग्दर्शक आणि अभिनेता अनुराग कश्यपवर कथित लैंगिक शोषणाचा आरोप पायल घोषने केला होता. तेव्हा केंद्रीय मंत्री रामदास आठवले यांच्या रिपब्लिकन पार्टी ऑफ इंडियाने (आरपीआय) तिला पाठिंबा दिला होता.

मुंबई -रिपब्लिकन पक्षाचे राष्ट्रीय अध्यक्ष केंद्रीय सामाजिक न्याय राज्यमंत्री रामदास आठवले यांच्या नेतृत्वाखाली आज अभिनेत्री पायल घोषने आरपीआयमध्ये प्रवेश केला. चित्रपट दिग्दर्शक आणि अभिनेता अनुराग कश्यपवर कथित लैंगिक शोषणाचा आरोप पायल घोषने केला होता. तेव्हा केंद्रीय मंत्री रामदास आठवले यांच्या रिपब्लिकन पार्टी ऑफ इंडियाने (आरपीआय) तिला पाठिंबा दिला होता. तेव्हापासून पायल आरपीआयमध्ये जाणार असल्याची चर्चा सुरू होती. आरपीआयमध्ये पायल घोषला महिला मोर्चाचे उपाध्यक्ष पद दिले जाऊ शकते, अशी चर्चा आहे. तसेच तिच्या वकिलाला सुद्धा प्रदेश उपाध्यक्ष बनवण्याची शक्यता आहे.

पायलने घेतली होती राज्यपालांची भेट -

20 सप्टेंबरला पायल घोषने अनुराग कश्यपवर लैंगिक छळाचा आरोप केला होता. १ ऑक्टोबर रोजी रोजी कश्यपला वर्सोवा पोलिसांनी चौकशीसाठी बोलवले होते. मात्र या प्रकरणाची चौकशी बरोबर होत नसल्याने तीने आरपीयचे प्रमुख नेते रामदास आठवले यांच्यासह महाराष्ट्राचे राज्यपाल भगत सिंह कोश्यारी यांची भेट घेतली होती. या प्रकरणाकडे लक्ष द्यावे, अशी मागणी रामदास आठवले यांनी राज्यपालांकडे केली होती. पायलच्या जीवाला धोका असल्यामुळे तिला पोलीस सुरक्षा मिळावी, अशी मागणी देखील केली, आठवले यांनी केली होती.

कंगना आणि पायलला दिले होते निमंत्रण

महाराष्ट्र सरकार आणि कंगना रणौत या दरम्यान तणावाचे वातावरण तयार झाले असताना रामदास आठवले यांनी कंगनाची भेट घेतली होती. यावेळी त्यांनी कंगनाला पक्षात येण्याचे निमंत्रण दिले होते. पण कंपनाने सध्याच कोणत्याही राजकीय पक्षात प्रवेश करण्याची इच्छा नसल्याचे त्यांना सांगितले होते. त्यानंतर आठवले यांनी पायललाही पक्षात येण्याचे निमंत्रण दिले होते. त्याप्रमाणे पायलने आज आरपीआयमध्ये प्रवेश केला आहे. तिला आता कोणतीही जबाबदारी दिली जाईल याकडे सर्वांचे लक्ष लागले आहे.

कंगनासाठी आयपीआय उतरली होती मैदानात

अभिनेत्री कंगना रणौत हिच्या संरक्षणासाठी रामदास आठवले यांचा रिपाइं पक्ष मैदानात उतरला होता. कंगना मुंबईत आल्यावर आरपीआयच्या कार्यकर्त्यांनी तिला संरक्षण दिले होते. तिला रिपब्लिकन पक्षाच्या वतीने संरक्षण देण्यासाठी रिपाइंचे कार्यकर्ते निळे झेंडे घेऊन मुंबई विमानतळावर सज्ज होते. तसेच कंगनाच्या घराला देखील रिपाइं कार्यकर्ते संरक्षण देतील, असे रिपब्लिकन पक्षाचे राष्ट्रीय अध्यक्ष केंद्रीय सामाजिक न्याय राज्यमंत्री आठवले यांनी सांगितले होते.