लातूर - ग्रामसभेत दारूबंदीचा ठराव घेतला जातो, तो नावालाच. मात्र, पोलीस कर्मचाऱ्यांनाच हाताशी धरून अवैध दारूविक्री सुरू आहे. त्यामुळे अनेकांचे संसार तर देशोधडीला लागतच आहे. शिवाय तरुण पिढीही उद्ध्वस्त होत आहे. गावात पाणी कमी अन् दारूच जास्त झाली असल्याचा आरोप करत औसा तालुक्यातील हरेगावच्या महिलांनी किल्लारी पोलीस ठाण्यासमोर ठिय्या दिला.
गावच्या ग्रामसभेत दारुबंदीचा ठराव घेण्यात आला होता. मात्र, यास पोलीस प्रशासनाचे सहकार्य मिळत नसल्याने पुन्हा अवैध दारू विक्री सुरू आहे. त्यामुळे मद्यपींची संख्या तर वाढत आहेच, शिवाय महिलांना गावात राहणेदेखील कठीण झाले आहे. दुष्काळी परिस्थितीने हाताला काम नाही आणि गावात दारूचा पूर येतोय. त्यामुळे संसाराचा गाडा हकावा तरी कसा, असा सवाल यावेळी महिलांनी उपस्थित केला आहे.
साहेब..., आमच्या गावात पाणी कमी अन् दारूच जास्त; पोलीस ठाण्यासमोरच महिलांनी मांडली कैफियत