लातुर - भाजप आणि शिवसेनेच्या युतीमुळे राज्यात आणि लातूर जिल्ह्यातही पोषक वातावरण निर्माण झाले आहे. मात्र, पालकमंत्री तथा कामगारमंत्री संभाजी पाटील निलंगेकर यांनी कामगारांसाठी वाटप करण्यात येत असलेल्या साहित्यामध्ये कोट्यवधींचा घोटाळा केला असून त्यांच्यामुळे युतीची बदनामी होत असल्याचा आरोप शिवसेनेचे जिल्हा संपर्क प्रमुख अभय साळुंके यांनी केला आहे. मुख्यमंत्र्यांनी याप्रकरणी चौकशी करून त्यांच्यावर कारवाई करावी, अशी मागणी त्यांनी केली आहे.
गेल्या ५ दिवसांपासून जिल्ह्यात महाराष्ट्र इमारत आणि बांधकाम कल्याणकारी मंडळाच्या वतीने कामगारांना बांधकाम साहित्य आणि ५ हजार रुपयांच्या निधी वाटपाचे कार्यक्रम मोठ्या दिमाखात घेतले जात आहेत. औसा, निलंगा, देवणी आणि शिरूर अनंतपाळ या तालुक्यामध्ये अद्यापर्यंत कामगार निधीचे वाटप झाले आहे. मात्र, या साहित्य वाटपात निलंगेकर यांनी हजारो कोटींचा घोटाळा केला आहे. कामगार कार्यालयात नोंद नसणाऱ्या भाजप कार्यकर्तांना या योजनेचा अधिक लाभ मिळवून दिल्याचा आरोपही पत्रकार परिषदेत अभय साळुंके यांनी केला. कामगारांचा निधी भाजप कार्यकर्त्यांमध्येच कसा राहील, याचे नियोजन पालकमंत्री संभाजी पाटील यांनी स्वतः केल्याचा आरोपही त्यांनी केला.