लातूर- पावसाअभावी जिल्ह्यातील शेतकरी अडचणीत सापडला आहे. जुलै महिना उलटला तरी खरिपाच्या पेरण्या रखडल्या असून बळीराजा अडचणीत आला आहे. त्यामुळे दुष्काळी भागातील या शेतकऱ्यांना प्रति हेक्टर ५० हजारांची मदत करण्याच्या मागणीसाठी मंगळवारी अहमदपूर तहसील कार्यालयासमोर धरणे आंदोलन करण्यात आले.
शेतकऱ्यांच्या प्रश्नावर मनसेचे अहमदपुरात धरणे आंदोलन
हंगामाच्या सुरवातीपासूनच पावसाने हुलकावणी दिलेली आहे. शिवाय अत्यल्प पावसावर शेतकऱ्यांनी पेरण्या केल्या. मात्र, पावसाने उघडीप दिल्याने या क्षेत्रावरील पिकांनाही धोका निर्माण झाला आहे. त्यामुळे दुबार पेरणीचे संकट ओढवले आहे. तसेच नापिकी आणि कर्जबाजारीपणाला कंटाळून शेतकऱ्यांच्या आत्महत्या वाढतच आहेत. शिवाय दुष्काळी अनुदानापासून शेतकरी वंचित आहे. त्यामुळे शेतकऱ्यांची आर्थिक कोंडी झाली असून मदतीची अपेक्षा व्यक्त होत आहे.