लातूर - निलंगा येथील तालुका कृषी कार्यालयात गेल्या महिन्यात एकूण ६१५ क्विंटल हरभरा पिकाचे बियाणे आले आहे. परंतु, या बियाणाचे कृषी सहायक अधिकाऱ्यांनी शेतकऱ्यांना वेळेत वाटप केले नाही. त्यामुळे कामात दिरंगाई करणाऱ्या २९ कृषी सहायक अधिकाऱ्यांवर कारवाई करण्यात आली असून त्यांची वेतनवाढ रोखण्यात आली आहे.
बियाणे वाटप करताना कृषी सहायकांकडून शेतकऱ्यांना परमिट देणे गरजेचे असते. त्या परमिटवर शेतकरी गोडाऊनमधून बियाणे घेऊ शकतात. हे परमिट देण्यास अधिकाऱ्यांकडून दिरंगाई झाली. त्यामुळे तालुका कृषी अधिकारी संजय नाबदे यांनी तालुका कार्यालयातील ३६ पैकी २९ कर्मचाऱ्यांची वेतनवाढ रोखली आहे.
हेही वाचा -लातुरात डेंग्यूची साथ, मात्र परिस्थिती आटोक्यात - जिल्हाधिकारी
वेतनवाढ थांबवल्यामुळे सर्व कर्मचाऱ्यांची शेतकऱ्यांना परमिट देण्यासाठी धांदल उडाली आहे. यासंबंधी तालुका कृषी अधिकारी संजय नाबदे यांना संपर्क केला असता, बियाणे वाटपात विलंब केल्यामुळे संबंधितांची वेतनवाढ थांबवल्याचे पत्र काढले असल्याचे त्यांनी सांगितले.
गेल्या आठवड्याभरात झालेल्या पावसामुळे शेतकऱ्यांचे मोठे नुकसान झाले आहे. शेतकऱ्यांच्या हातातोंडाशी आलेला घास हिरावून घेतला गेला आहे. प्रत्येक लोकप्रतिनिधीने पाहणी केल्याचा फार्स करत तत्काळ पंचनामे करण्याचे आदेश सोडले. मात्र, अद्याप शंभर टक्के पंचनामे पूर्ण झालेले नाहीत. नुकसान भरपाईचा किचकट अर्ज भरणे शेतकऱ्यांना अवघड जात आहे. त्यातच आता कृषी कार्यालयाकडून बियाणे वाटपात हलगर्जीपणा झाल्याचे समोर आले आहे.
