पदवीधर मतदार संघ निवडणूक: कोल्हापूरच्या जिल्हाधिकाऱ्यांनी रांगेत उभे राहून बजावला मतदानाचा अधिकार

जिल्ह्यात सकाळपासून मतदानासाठी नागरिक बाहेर पडले होते. जिल्ह्यातील अन्य प्रशासकीय अधिकाऱ्यांनी विविध मतदान केंद्रावर मतदानाचा हक्क बजावला.

कोल्हापूर - पदवीधर मतदार संघ निवडणुकीचे मतदान आज पार पडले. जिल्हाधिकारी दौलत देसाई यांनी सामान्य नागरिकांप्रमाणे रांगेमध्ये उभे राहून न्यु मॉडेल इंग्लिश स्कुलमधील मतदान केंद्रात मतदानाचा हक्क बजावला.

जिल्ह्यात सकाळपासून मतदानासाठी नागरिक बाहेर पडले होते. जिल्ह्यातील अन्य प्रशासकीय अधिकाऱ्यांनी विविध मतदान केंद्रावर मतदानाचा हक्क बजावला.

सायंकाळी चारपर्यंतच्या आकडेवारीनुसार झाले 'इतके' मतदान -कोल्हापूर जिल्ह्यात एकूण 89 हजार 529 इतके मतदार आहेत. त्यामध्ये 62 हजार 709 पुरुष पदवीधर मतदार आहेत तर 26 हजार 820 स्त्री पदवीधर मतदार आहेत. शिक्षण मतदारसंघात 12 हजार 237 मतदार आहेत. त्यामध्ये 8 हजार 879 इतके पुरुष शिक्षक मतदार आहेत. तर 3 हजार 358 स्त्री शिक्षक मतदार आहेत. त्यापैकी सायंकाळी चारपर्यंतच्या मिळालेल्या आकडेवारीनुसार पदवीधर मतदारसंघातील जवळपास 61 टक्क्यांहून अधिक मतदान झाले. तर शिक्षक मतदारसंघात जवळपास 83 टक्क्यांहून अधिक मतदान झाले.

पदवीधर मतदार संघ मतदान

इतर प्रशासकीय अधिकाऱ्यांनीसुद्धा बाजावला मतदानाचा हक्क -

उपजिल्हाधिकारी संजय शिंदे यांनी न्यु मॉडेल हायस्कुलमधील मतदान केंद्रावर आपला मतदानाचा अधिकार बजावला. जिल्हा माहिती अधिकारी प्रशांत सातपुते यांनी जयसिंगपूर येथील लक्ष्मीनारायण मालू हायस्कूलमधील मतदान केंद्रावर सपत्नीक मतदानाचा हक्क बजावला. जिल्हा समाज कल्याण अधिकारी दीपक घाटे यांनी मिरजकर तिकटी येथील नूतन मराठी विद्यालय येथील मतदान केंद्रावर मतदानाचा हक्क बजावला.

पदवीधर मतदार संघ मतदान

चार पदे झाली होती रिक्त -

पुणे पदवीधर मतदारसंघातून भाजपा अध्यक्ष चंद्रकांत पाटील हे निवडून आले होते. मात्र, गेल्यावर्षी झालेल्या विधानसभा निवडणुकीत पुण्यातील कोथरूड विधानसभा मतदारसंघातून निवडणूक लढवून ते विजयी झाल्याने ही पदवीधरची जागा रिक्त राहिली होती. नागपूरमधून भाजपाचे सदस्य अनिल सोले यांचीही 19 जुलैलाच मुदत संपली होती, तर औरंगाबाद पदवीधर मतदारसंघातून राष्ट्रवादी काँग्रेसचे सदस्य सतीश चव्हाण तसेच शिक्षक मतदारसंघापैकी पुण्यातील अपक्ष सदस्य दत्तात्रय सावंत, अमरावती शिक्षक मतदारसंघातील श्रीकांत देशपांडे यांचीही मुदत यादरम्यान संपुष्टात आली होती. मात्र, कोरोनाच्या पार्श्वभूमीवर या निवडणुकीचा कार्यक्रम लांबणीवर पडला होता.

दोन दिवसांनी म्हणजेच 3 डिसेंबरला या पाचही जागांचा निकाल जाहीर होणार आहे. या निवडणुकीत महाविकास आघाडी आणि भाजप यांच्यात थेट लढत होत आहे.