जालना - कोरोनाच्या महामारीतून आता जनजीवन सुरळीत सुरू होत आहे आणि अनेक उद्योग व्यवसायांना परवानगीही मिळाली आहे. याच धर्तीवर रहाट पाळणे आणि जत्रेतील मुलांसाठी छोट्या खेळण्यांना परवानगी द्यावी, अशी मागणी राष्ट्रीय लहूशक्ती सामाजिक संघटनेच्या वतीने जिल्हाधिकार्‍यांकडे करण्यात आली आहे.
कोरोनाच्या पार्श्वभूमीवर गेल्या चार महिन्यांपासून रहाट पाळणे, जंपिंग जंपिंग, गोल राहट पाळणे अशा विविध प्रकारच्या खेळण्याचे व्यवसाय बंद पडले आहेत. सध्या विविध सणांचे दिवस आहेत. त्यामुळे मंदिराच्या परिसरांमध्ये अशा प्रकारच्या खेळण्यांना चांगली मागणी असते. त्यामुळे या खेळण्यांना जिल्हाधिकाऱ्यांनी परवानगी द्यावी अशी, मागणी करण्यात आली आहे. या व्यवसायिकांच्या हाताला गेल्या चार महिन्यांपासून काम नसल्यामुळे त्यांच्या कुटुंबियांवर उपासमारीची वेळ आली आहे. एक रहाटपाळणा दहा लोकांची उपजीविका भागवतो. मात्र, कोरोनामुळे हे सर्व बंद असल्याने अनेक परिवार उपासमार सोसत आहेत. त्यामुळे, परवानगी मिळाल्यानंतर सोशल डिस्टन्स पाळत व्यवसाय करण्यात येईल, अशी हमीदेखील या निवेदनात देण्यात आली आहे.