जालना -ग्रामीण भागातील विद्यार्थ्यांमध्ये ज्ञानाची कमतरता नाही. त्यांच्या कलागुणांचा योग्य वापर केला तर त्यांची कल्पकता दिसून येते. त्यामुळे शिक्षकांनी विद्यार्थ्यांतील कलागुण आणि संशोधनाची वृत्ती हेरण्याची गरज आहे, असे मत निर्मल क्रीडा समाज प्रबोधन ट्रस्टचे संस्थापक डॉ. दत्ताभाऊ पाथ्रीकर यांनी व्यक्त केले. निर्मल क्रीडा समाज प्रबोधन ट्रस्टच्या कला, विज्ञान व वाणिज्य महाविद्यालयाच्या वार्षिक स्नेहसंमेलनांतर्गत विज्ञान प्रदर्शन आयोजित करण्यात आले होते.
यावेळी प्रमुख पाहुणे म्हणून आमदार नारायण कुचे, पोलीस निरीक्षक मारुती खेडकर हे उपस्थित होते. विद्यार्थ्यांमध्ये नैसर्गिक गुणवत्ता ठासून भरलेली असते. त्यांच्यातूनच काही भाविष्यात वैज्ञानिक बनू शकतात. विद्यार्थ्यांना शिक्षकांच्या योग्य मार्गदर्शनाबरोबरच नैसर्गिक वातावरण उपलब्ध करून दिले पाहिजे, असेही डॉ. पाथ्रीकर म्हणाले.
हेही वाचा - शरजील इमामच्या अटकेविरोधात जामिया विद्यापीठात विद्यार्थ्यांचे आंदोलन
बदनापूर हा तालुका शैक्षणिकदृष्टया अतिशय मागासलेला होता. तरीही डॉ. दत्ताभाऊ पाथ्रीकर यांनी या तालुक्यात शैक्षणिक सोयी सुरू करून दिल्यामुळे या तालुक्यातील विद्यार्थ्यांना एकाच छताखाली उच्च शिक्षणाच्या संधी निर्माण होऊ शकल्या. विज्ञान प्रदर्शनातील मुलींचा सहभाग पाहून मुली याच कुळाची पणती आणि घरची लक्ष्मी असल्याचा उल्लेख करून कार्यक्रमाचे प्रमुख पाहुणे आमदार नारायण कुचे विद्यार्थिंनीचा हुरूप वाढवला.
विज्ञान प्रदर्शनात विविध वैज्ञानिक आणि दैनंदिन वापरात येतील, असे शोध विद्यार्थ्यांनी सादर केले. संस्थेंतर्गत असलेल्या इन्स्टीट्यूट ऑफ फार्मसी आणि विविध शाळांतील विद्यार्थ्यांनी या प्रदर्शनात सहभाग नोंदवला. ट्विंकल स्टार स्कूलच्या विद्यार्थ्यांनी शेतीतील वन्यजीव हाकलून लावण्यासाठी तयार केलेली तोफ सर्वांचे लक्ष वेधून घेत होती.
दोन दिवस चालणाऱ्या या प्रदर्शनाला बदनापूर तालुक्यातील विविध शाळांच्या विद्यार्थ्यांनी भेट दिली. विज्ञान प्रदर्शनातून विद्यार्थ्यांनी विज्ञानातून अंधश्रध्दा निर्मूलन करण्याचाही प्रयत्न केला. या कार्यक्रमाला प्राचार्या डॉ. एम. डी. पाथ्रीकर, शिवसेनेचे तालुका प्रमुख जयप्रकाश चव्हाण, डॉ. देवेश पाथ्रीकर, हरिचंद्र शिंदे, एस. एस. खान, एन. जी. मदन, डॉ. झेड. ए. पठाण हेही उपस्थित होते.
