धक्कादायक; उभ्या ट्रकमधून चोरट्यांनी लांबवले १२ सिलिंडर

भारत गॅस एजन्सी येथे गेटजवळ ट्रक लावून निवृत्ती पांडुरंग महाजन हे घरी गेले होते. दुसऱ्या दिवशी २२ मे रोजी सकाळी नेहमीप्रमाणे कामावर आल्यानंतर ट्रकमधील १२ गॅस सिलिंडर चोरीस गेल्याचे त्यांच्या लक्षात आले. ट्रकच्या मागच्या बाजूचा लोखंडी दरवाजाही त्यांना अर्धवट उघडा दिसून आला.

जळगाव- भारत गॅस एजन्सीसमोर उभ्या असलेल्या ट्रकमधून चोरट्यांनी १२ सिलिंडर चोरून नेले. या प्रकरणी शनिवारी एमआयडीसी पोलीस ठाण्यात गुन्हा दाखल करण्यात आला आहे. निवृत्ती पांडुरंग महाजन असे त्या तक्रार दाखल केलेल्या ट्रक चालकाचे नाव आहे.

जळगाव शहरातील अयोध्यानगरात निवृत्ती पांडुरंग महाजन हे भारत गॅस एजन्सीत ट्रक चालक म्हणून काम करतात. ते मुंबईतील राजेश देवीदास बोरसे यांच्या मालकीचा ट्रक क्रमांक (एमएच ०४, सीपी ५५६७ ) वर गेल्या चार वर्षांपासून कामाला आहेत. २१ मे रोजी औरंगाबाद येथून गॅस एजन्सीतून दुपारी १२ . ३० वाजता ट्रकमध्ये गॅस सिलिंडर भरून सायंकाळी ६ वाजता जळगावात दाखल झाले.

जळगाव शहरातील भारत गॅस एजन्सी येथे गेटजवळ ट्रक लावून ते घरी गेले होते. दुसऱ्या दिवशी २२ मे रोजी सकाळी ८ वाजता नेहमीप्रमाणे कामावर आल्यानंतर ट्रकमधील १२ गॅस सिलिंडर चोरीस गेल्याचे त्यांच्या लक्षात आले. ट्रकच्या मागच्या बाजूचा लोखंडी दरवाजा अर्धवट उघडा दिसून आला. त्यानंतर निवृत्ती महाजन यांनी पोलिसात धाव घेतली.

चोरीस गेलेल्या सिलिंडरची किंमत १६ हजार ८०० रुपये इतकी आहे. याप्रकरणी ट्रक चालक निवृत्ती महाजन यांच्या तक्रारीवरून एमआयडीसी पोलीस ठाण्यात चोरट्यांविरुद्ध गुन्हा दाखल करण्यात आला आहे. या घटनेचा पुढील तपास विजय पाटील करत आहेत.