नेत्यांचा निर्णय मान्य, आम्ही खडसेंचे स्वागत करू - माजी मंत्री गुलाबराव देवकर

खडसेंच्या राष्ट्रवादी प्रवेशाविषयी आमच्या पक्षाचे वरिष्ठ नेते निर्णय घेतील. नेत्यांचा निर्णय आम्हाला मान्य असेल. आम्ही एकनाथ खडसे यांचे पक्षात स्वागतच करू', अशी प्रतिक्रिया गुलाबराव देवकर यांनी दिली आहे.

जळगाव - भाजपचे माजीमंत्री एकनाथ खडसे यांच्या राष्ट्रवादी प्रवेशाची सध्या जोरदार चर्चा सुरू आहे. याच पार्श्वभूमीवर, राष्ट्रवादीचे माजीमंत्री गुलाबराव देवकर यांनी खडसेंच्या राष्ट्रवादी प्रवेशाचे संकेत आज जळगावात पत्रकारांशी बोलताना दिले. 'खडसेंच्या राष्ट्रवादी प्रवेशाविषयी आमच्या पक्षाचे वरिष्ठ नेते निर्णय घेतील. नेत्यांचा निर्णय आम्हाला मान्य असेल. आम्ही एकनाथ खडसे यांचे पक्षात स्वागतच करू', अशी प्रतिक्रिया गुलाबराव देवकर यांनी दिली आहे.

राष्ट्रवादी युवक काँग्रेसच्या वतीने केंद्र सरकारने मंजूर केलेला कृषी सुधारणा कायदा आणि हाथरस घटनेच्या विषयाबाबत शनिवारी दुपारी जिल्हाधिकाऱ्यांना निवेदन दिले. यानंतर गुलाबराव देवकर पत्रकारांशी बोलत होते. देवकर पुढे म्हणाले की, भाजप नेते एकनाथ खडसे यांच्या राष्ट्रवादी प्रवेशाबाबत पक्षाचे अध्यक्ष शरद पवार, उपमुख्यमंत्री अजित पवार तसेच प्रदेशाध्यक्ष जयंत पाटील हे नेते निर्णय घेतील. त्यांनी घेतलेला निर्णय आम्हाला मान्य असेल. वरिष्ठ नेत्यांनी खडसेंबाबत सकारात्मक भूमिका घेतली तर आमचा त्याला पाठींबा असेल. खडसेंच्या प्रवेशामुळे पक्षाला फायदा होणार असेल, पक्षसंघटन मजबूत होत असेल तर चांगलेच आहे. आम्ही खडसेंचे पक्षात स्वागतच करू, असे गुलाबराव देवकर यांनी सांगितले.

पक्षसंघटनेतील बदलाबाबत कानावर हात-

एकनाथ खडसे यांच्या राष्ट्रवादी प्रवेशाच्या अनुषंगाने जळगाव जिल्ह्यात राष्ट्रवादीच्या स्थानिक पक्षसंघटनेत फेरबदल होणार असल्याची सध्या जोरदार चर्चा आहे. याबाबत पत्रकारांनी गुलाबराव देवकर यांना विचारणा केली असता, त्यांनी कानावर हात ठेवले. पक्षसंघटनेत फेरबदल होणार, याबाबत काहीही हालचाली सुरू नाहीत. अशी बातमी माध्यमांमधूनच मला समजली. पण तसे काहीही नाही. सध्या जिल्ह्यातील पक्षसंघटनेचे उत्तम काम सुरू आहे. त्यामुळे फेरबदलाचा विषयच नाही, असे गुलाबराव देवकर म्हणाले.

हेही वाचा -'हे दिशाहीन सरकार आहे; शेतकरी, महिला, विद्यार्थी कुठल्याच प्रश्नावर सरकार गंभीर नाही'