जळगाव - भाजपने आज रात्री उशिरा आपल्या उमेदवारांची दुसरी यादी जाहीर केली. या यादीतही भाजपने ज्येष्ठ नेते एकनाथ खडसेंना स्थान दिलेले नाही. त्यामुळे खडसेंचा पत्ता कापल्याचे जवळजवळ स्पष्ट झाल्याची चर्चा जिल्हा आणि राजकीय वर्तुळात सुरू आहे.
हेही वाचा - भाजपमध्ये बंडखोरी? यादीत नाव नसतानाही एकनाथ खडसेंचा उमेदवारी अर्ज दाखल
विधानसभा निवडणुकीसाठी भाजपने आज रात्री १४ उमेदवारांचा समावेश असलेली दुसरी यादी जाहीर केली. पहिल्या यादीत खडसेंच्या नावाचा समावेश नव्हता. त्यानंतर घडलेल्या घडामोडींमुळे खडसेंना दुसऱ्या यादीत स्थान मिळेल किंवा नाही, याची प्रचंड उत्सुकता होती. मात्र, ही यादी जाहीर झाल्यानंतर खडसेंसह त्यांच्या समर्थकांच्या पदरी पुन्हा एकदा निराशा आली आहे. भाजपकडून आता आपली तिसरी आणि अंतिम यादी उद्या जाहीर होण्याची शक्यता आहे. या यादीत खडसेंना स्थान दिले जाते का? याकडे लक्ष लागले आहे.