अभिजित राऊत जळगावचे नवे जिल्हाधिकारी; डॉ. अविनाश ढाकणे यांची उचलबांगडी

जिल्हाधिकारी डॉ. अविनाश ढाकणे यांची राज्य सरकारने उचलबांगडी केली आहे. त्यांच्या जागी सांगली जिल्हा परिषदेचे मुख्य कार्यकारी अधिकारी अभिजित राऊत यांची नियुक्ती करण्यात आली आहे. नवनियुक्त जिल्हाधिकारी अभिजित राऊत हे गुरुवारी दुपारनंतर पदभार स्वीकारणार आहेत.

जळगाव - जिल्हाधिकारी डॉ. अविनाश ढाकणे यांची राज्य सरकारने उचलबांगडी केली आहे. त्यांच्या जागी सांगली जिल्हा परिषदेचे मुख्य कार्यकारी अधिकारी अभिजित राऊत यांची नियुक्ती करण्यात आली. याबाबतचे आदेश बुधवारी रात्री उशिरा राज्य सरकारकडून जारी करण्यात आले आहेत. दरम्यान, जिल्ह्यात कोरोना नियंत्रणात अपयश आल्यानेच डॉ. ढाकणे यांची उचलबांगडी झाल्याचे बोलले जात आहे.

डॉ. अविनाश ढाकणे यांची जळगावातून बदली झाली आहे. मात्र, त्यांच्या पदस्थापनेबाबत राज्य सरकारने अद्याप स्पष्टता केलेली नाही. नवनियुक्त जिल्हाधिकारी अभिजित राऊत हे गुरुवारी दुपारनंतर पदभार स्वीकारणार आहेत. सांगली जिल्हा परिषदेचे मुख्य कार्यकारी अधिकारी म्हणून त्यांनी त्याठिकाणी अनेक महत्त्वाकांक्षी योजना यशस्वीपणे राबवल्या आहेत. आता त्यांच्यासमोर जळगाव जिल्ह्यातील विस्कटलेली प्रशासकीय घडी तसेच वाढता कोरोना संसर्ग रोखणे ही दोन प्रमुख आव्हाने असणार आहेत.

जळगाव जिल्ह्यात कोरोनाचा शिरकाव झाल्यापासून जिल्हा प्रशासन आणि आरोग्य यंत्रणा ठोस उपाययोजना करण्यात अपयशी ठरल्याचा आरोप सातत्याने केला जात होता. त्याची दखल घेऊन राज्य सरकारने आधी आरोग्य यंत्रणेत फेरबदल केले. प्रभारी अधिष्ठाता डॉ. भास्कर खैरे यांच्या निलंबनानंतर त्यांच्या जागी डॉ. जयप्रकाश रामानंद यांची नियुक्ती करण्यात आली. त्यानंतर सरकारने जिल्हा प्रशासनाचे प्रमुख असलेल्या जिल्हाधिकाऱ्यांची बदली केली असून, नवे जिल्हाधिकारी नियुक्त केले आहेत.

दरम्यान, डॉ. अविनाश ढाकणे हे 11 फेब्रुवारी 2019 रोजी जळगावात जिल्हाधिकारी म्हणून रुजू झाले होते. गेल्या दीड वर्षात त्यांनीही प्रशासकीय कामकाजात आपली छाप पाडली होती. परंतु, कोरोनाची परिस्थिती हाताळण्यात ते अपयशी ठरल्याचा आरोप आहे. त्यांच्या कार्यकाळात लोकसभा तसेच विधानसभा निवडणुका पार पडल्या. आपल्याला जळगावात खूप काही शिकायला मिळाले, असेही डॉ. ढाकणे म्हणाले.