वाट पाहीन...पण एसटीनेच जाईन! आजपासून राज्यभरात बससेवा सुरू

आता राज्यभरात एसटी बसेस सुरू करण्याचा निर्णय परिवहन मंत्री अनिल परब यांनी दिला. आजपासून राज्यभरात बसेस धावत आहेत. परंतु, पहिल्याच दिवशी एसटी बसेस विनाप्रवासी धावत आहेत.

हिंगोली - मागील पाच महिन्यांपासून राज्य शासनाने राज्य परिवहन बंद केले होते. कोरोनाचा प्रादुर्भाव टाळण्यासाठी संबंधित निर्णय घेण्यात आला. मात्र, आता राज्यभरात एसटी बसेस सुरू करण्याचा निर्णय परिवहन मंत्री अनिल परब यांनी दिला. आजपासून राज्यभरात बसेस धावत आहेत. परंतु, पहिल्याच दिवशी एसटी बसेस विना प्रवासी धावत आहेत. एरव्ही एसटीची वाट बघत प्रवासी उभे असायचे, मात्र आता लालपरीलाच प्रवाशांची वाट पाहावी लागणार आहे.

सध्या सुरक्षेच्या दृष्टिकोनातून एका बाकावर एक प्रवासी, अन तोंडाला मास्क-रुमाल बांधणे बंधनकारक आहे.

संपूर्ण राज्यात कोरोनाचा कहर वाढलेला असताना देखील प्रवाशांना एसटी बसने प्रवास करण्यासाठी आजपासून मुभा देण्यात आली आहे. त्यानुसार हिंगोलीत तब्बल पाच महिन्यांनंतर बस सेवा सुरू झाली आहे. परभणी मार्गे निघालेली ही बस प्रवाशांविनाच धावली. सध्या जिल्ह्यात आठ दिवसांपासून पावसाची संततधार सुरू आहे. त्यातच कोरोनाची रुग्ण संख्या देखील वाढत असल्याने नागरिकांनी बसने प्रवास करणे टाळले आहे.

पहिल्याच दिवशी एसटी बसेस विना प्रवासी धावत आहेत.

आज जिल्ह्यातील लॉकडाऊन शिथिल करण्यात आले. तसेच आजपासूनच बससेवा देखील सुरू करण्यात आली. त्यामुळे नागरिक आणि प्रवाशांमध्ये आनंदाचे वातावरण निर्माण झाले आहे. मात्र आता लालपरीला प्रवाशांची प्रतीक्षा करण्याची वेळ येणार आहे. तसेच यापुढे बसेसने प्रवास करण्यासाठी नियमांचे पालन करावे लागणार आहे.

एका बाकावर केवळ एकच प्रवासी प्रवास करेल, त्या प्रवाशाला प्रवास करण्यासाठी ई-पासची आवश्यकता राहणार नाही. मात्र खासगी गाडीने प्रवास करण्यासाठी ई-पास बंधनकारक आहे. तसेच प्रवाशांना मास्क बंधनकारक असून, मास्क नसल्यास रुमालाने तोंड बांधणे आवश्यक आहे. मुख्य म्हणजे प्रवाशांना तालुक्यातून, जिल्ह्यातून प्रवास करता येणार आहे. बसमधून सर्व प्रकारचे प्रवासी, ज्येष्ठ नागरिक, विद्यार्थी या सर्वांना प्रवास करता येणार आहे.