हिंगोली- देवस्थानांना पशुबळी देण्याची परंपरा महाराष्ट्रात नवीन नाही. पण, आता लोक जागृत होत असून अशा प्रकारांना विरोध करू लागले आहेत. जिल्ह्यातील कोथळज गावातील नागरिकांनी गावात होणाऱ्या पशूहत्येला विरोध केला आहे. देवाच्या दर्शनासाठी आलेल्या भाविकांना पुरी-भाजीचा प्रसाद वाटण्याचा पर्याय त्यांनी शोधला आहे. भाविकांकडूनही गावकऱ्यांच्या या उपक्रमाला हळूहळू प्रतिसाद मिळत आहे.
पशुहत्येला विरोध करुन गावकऱ्यांनी पुरी भाजीचा प्रसाद सुरू केला आहे
कोथळज येथे गैबू पिर हे देवस्थान आहे. सर्वधर्मीय भाविक या ठिकाणी दर्शनासाठी येत असतात. या ठिकाणी संदल हा उत्सव मोठ्या उत्साहात साजरा होतो. संदलच्या दिवशी बोकडाचा बळी देण्याची प्रथा ३ पिढ्यांपासून चालू आहे. लोकांची श्रद्धा असल्याने ही प्रथा वर्षानुवर्षे चालुच होती. पण, याचे दुष्परिणाम गावकऱ्यांना जाणवू लागल्याने त्यांनी याला विरोध करायला सुरुवात केली.