हिंगोली मतदारसंघात तान्हाजी मुटकुळे अन् रामराव वडकुते यांच्यात सामना रंगणार?

हिंगोली मतदार संघावर १९९९ पासून काँग्रेसचे वर्चस्व होते. मात्र, २०१४ च्या विधानसभा निवडणुकीत भाजपचे विद्यमान आमदार तान्हाजी मुटकुळे यांनी हिंगोली मतदार संघ आपल्या ताब्यात घेतला.

हिंगोली -यंदाच्या विधानसभा निवडणुकीत जिल्ह्यावरील आघाडीचे वर्चस्व कमी होऊन युतीची ताकद वाढू शकते, अशी परिस्थिती सध्या जिल्ह्यातील ३ विधानसभा मतदारसंघात निर्माण झाली आहे. तसेच ऐन वेळी युती तुटल्यास वसमत, कळमनुरी आणि हिंगोली या तीन मतदारसंघात चुरशीची लढाई होणार आहे. तसेच युती आणि आघाडी सोडून सुरुवातीपासूनच कामाला लागलेले काही इच्छुक तर ऐन वेळी कोणताही झेंडा घेऊन मैदानात उतरण्याच्या तयारीत असल्याचे चित्र आहे. तर काही संभ्रमात पडले असून त्यांना कोणता झेंडा घेऊ हाती अशीच काहीशी परिस्थिती झाली आहे.

हेही वाचा -आढावा मतदारसंघाचा : अतिसंवेदनशील 'अहेरी मतदारसंघात' तिरंगी लढतीची शक्यता

हिंगोली मतदारसंघावर १९९९ पासून काँग्रेसचे वर्चस्व होते. मात्र, २०१४ च्या विधानसभा निवडणुकीत भाजपचे विद्यमान आमदार तान्हाजी मुटकुळे यांनी हिंगोली मतदारसंघ आपल्या ताब्यात घेतला. सध्या मुटकुळे यांची या मतदारसंघावर जबरदस्त पकड आहे. ही पकड विधानसभेत ही टिकवून ठेवण्यासाठी त्यांनी सातत्याने प्रयत्न सुरू ठेवले आहेत. या मतदारसंघात अनेक जण ऐनवेळी कोणताही झेंडा घेऊन निवडणुकीच्या रिंगणात उतरण्याच्या तयारीत आहेत. हा मतदारसंघ काँग्रेसकडून राष्ट्रवादीला सोडावा, यासाठी विधान परिषदेचे आमदार रामराव वडकुते यांनी कसोशीने प्रयत्न सुरू केले आहेत. त्यांनी ताकतोडा येथे दाखल झालेल्या शिवस्वराज्य यात्रेत वरिष्ठांकडे याबाबत चर्चाही केली. त्यामुळे हा मतदार संघ नेमका राष्ट्रवादी की काँग्रेसकडे राहतो, हे पाहणे महत्त्वाचे ठरणार आहे.

हेही वाचा -आढावा उस्मानाबाद विधानसभेचा : राजेनिंबाळकरांना थोपवण्यासाठी पाटील जाणार भाजपत?

या मतदारसंघात युती आणि आघाडीच्या व्यतिरिक्त निवडणूक रिंगणात उतरण्यासाठी अनेक जण इच्छुक आहेत. राष्ट्रवादीचे दिग्गज मुनीर पटेल यांनी राष्ट्रवादीला सोडचिठ्ठी दिल्याने ते काय करतात यावर सुद्धा येथील गणिते अवलंबून आहेत. तसेच पटेल यांचा मुलगा ही वंचितकडून निवडणूक लढविण्यासाठी इच्छुक आहे. त्यांच्यासह अनेक दिग्गज वंचितच्या संपर्कात आहेत. तर काही जण निवडणूक लढवण्यासाठी कोणत्याही पक्षाचा झेंडा खांद्यावर घेण्याच्या तयारीत आहेत.

हिंगोली मतदारसंघावर विद्यमान आमदार तान्हाजी मुटकुळे यांचे वर्चस्व असून सद्या त्यांनी मतदारसंघात सर्वत्र भूमीपूजन कामाचा धडाका सुरू केला आहे. मात्र, 2-4 गावातील कामे सोडता बऱ्याच गावातील कामाला प्रत्यक्षात अजून सुरुवात झालेली नाही. त्यांनी मंदिर आणि सभागृह बांधण्यावर भर दिल्यामुळे इतर गोष्टी म्हणजे मतदार संघातील शाळांचा काया पालट केलेला नाही. त्यामुळे सभागृहात बसून मंदिरातील घंटा मतदारांनी वाजवावी का? असा प्रश्न नागरिक उपस्थित करत आहेत.

हेही वाचा -शिर्डी विधानसभा आढावा: विखेंना शह देण्यासाठी सत्यजित तांबे सज्ज?

हिंगोली मतदारसंघातील समस्या

शेतकऱ्यांची समस्या

शेतकऱ्यांच्या पीक कर्जाचा प्रश्न ही खूप गंभीर आहे. मतदारसंघातील काही गावांनी तर कर्जासाठी आपले गाव विक्रीस काढले आहे. तरी देखील शेतकऱ्यांना कर्ज माफी मिळत नाही. मात्र, तरीही आमदार मुटकुळे सरकारच्यावतीने कर्जमाफी सुरूच असल्याचे सांगत आहेत.

सिंचन प्रश्न

जिल्ह्याचा सिंचन प्रश्न अजूनही सुटलेला नाही. मुटकुळे हा सोडविण्यासाठी प्रयत्नशील असल्याचे दाखवत आहेत. मात्र, आता कुठे कयाधू नदीवरील बंधारे पूर्ण झालेत आणि त्यावर स्वयंचलित गेट बसवण्यासाठी परवानगी मिळणार आहे. त्यामुळे पुढील वर्षीच हे पाणी नदीमध्ये साठणार आहे. त्यामुळे यावर्षी हे पाणी मतदारसंघातील मतदारांना फक्त वाहतेच पहावे लागणार आहे.

रोजगाराचा प्रश्न

या मतदार संघातील बेरोजगारीचा प्रश्न अजून सुटलेला नाही. त्यामुळे कामासाठी येथील तरुण वर्ग मोठ्या प्रमाणावर स्थलांतर करत आहे. तसेच औद्योगिक वसाहतीत अपुरे उद्योग सुरू असून कच्च्या मालावर प्रक्रिया करण्यासाठी कारखानदारांना आणि नागरिकांना इतर जिल्ह्यात जावे लागत आहे. त्यामुळे जिल्ह्यात औद्योगिक वसाहत असूनही काही उपयोग नसल्याची खंत मतदार व्यक्त करत आहेत.